Навоийдаги савдо мажмуасида набираси билан эскалатордан тушиб кетган бобо вафот этди (видео)

Ижтимоий тармоқларда Навоий шаҳридаги «Янги ҳаёт» савдо мажмуасида бобо ва набира эскалатордан қулаб тушгани тасвирланган видеолавҳа тарқалди. Навоий вилояти ИИБ ҳолатга оид маълумотлар билан бўлишди.

Маълум қилинишича, кўнгилсиз ҳодиса 18 февраль куни соат 20:30 ларда содир бўлган. Кармана туманида яшовчи Ш.Т. (1969 йилда туғилган) 3 ёшли набираси А.С. билан Навоий шаҳридаги «Янги ҳаёт» савдо мажмуасига борган. Улар савдо мажмуасининг 5- ва 4-қават оралиғидаги эскалаторда мувозанатни йўқотиб, 1-қаватга тушиб кетган.

Фуқаро Ш.Т. воқеа жойида вафот этган. Тан жароҳати олган А.С. эса вилоят кўп тармоқли болалар тиббиёт марказига ётқизилган.

Ҳолат юзасидан Навоий шаҳар ИИБ ҳузуридаги Тергов бўлими томонидан терговга қадар текширув ҳаракатлари олиб борилмоқда.

«Gazeta.uz»нинг маълум қилишича, ҳозирда боланинг аҳволи оғир ва у реанимация бўлимида. Унга оғир қўшма жароҳат, хусусан, бош мия ёпиқ жароҳати, унинг лат ейиши, чаноқ суякларининг ўнг томонлама синиши билан ташхис қўйилган. Шунингдек, унда пешона соҳаси териости гематомаси ҳамда посттравматик шокнинг оғир даражаси қайд этилган. Шифокорнинг сўзларига кўра, боланинг эс-ҳуши карахтлашган, 19 февраль МРТ ва бошқа барча текширувлар ўтказилган. Стандартлар бўйича барча муолажалар олиб бориляпти.

Аввалроқ Андижон давлат университети биноси тўртинчи қаватидан ота-оналар мажлисига келган аёл тушиб кетгани тўғрисида хабар берилганди.