Бухорода вилоят ҳокими раҳбарлик қилаётган биринчи сектор ҳудудида жиноятлар сони кескин ошгани маълум қилинди

Бухоро вилоятида вилоят раҳбари бошчилик қилаётган биринчи сектор ҳудудида жиноятлар сони кескин ошган. Бу ҳақда вилоят ИИБ бошлиғи Шуҳрат Алиев иштирокидаги матбуот анжуманида маълум қилинди, дея хабар берди «Дарё» мухбири.

Қайд этилишича, вилоят ИИБ раҳбари иштирокидаги матбуот анжуманида вилоятдаги тўртта сектор ҳудудида жиноятлар сони 2021 йилда аввалги йилларга нисбатан кескин ошгани айтиб ўтилган.

«Вилоят ҳокимига тегишли сектор ҳудудида барча соҳалар бўйича жиноятлар сони 485 тага ортиб, 1303 тани ташкил қилган. Содир этилган жиноятларнинг 738 таси ёки 56 фоизи биринчи сектордаги тўртта ҳудуд ҳиссасига тўғри келмоқда. Вилоят прокурори секторида жиноятлар сони 434 тага ортган бўлиб, умумий кўрсаткич 1244 тани кўрсатган. Вилоят Ички ишлар бошқармаси бошлиғи, ўзимга тааллуқли учинчи сектор ҳудудида эса йил давомида 1194 та жиноят содир этилган. Бу аввалги йилларга нисбатан жиноятлар 324 тага кўп, дегани. Вилоят солиқ бошқармаси бошлиғи сектори ҳудудида эса барча соҳалар бўйича жиноятлар сони 454 тага кўпайиб, 1056 та жиноят содир этилган», — дейди вилоят ИИБ бошлиғи Шуҳрат Алиев.

Вилоят ИИБ ахборот хизмати раҳбари Шуҳрат Жалолов ҳудудларда содир этилаётган жиноятлар биргина ички ишлар органлари томонидан эмас, барча ҳуқуқ-тартибот идоралари вакиллари ҳамкорлигида аниқланаётганини айтмоқда.

«Ҳудудларда содир этилаётган жиноятлар биргина ички ишлар органлари томонидан эмас, барча ҳуқуқ-тартибот идоралари вакиллари ҳамкорлигида аниқланмоқда. Шу нуқтаи назардан, жиноятлар сони ўтган йиллардагига нисбатан ошиб кетган. Бу орқали фақатгина жиноятнинг оқибатларидан хабардор бўлинмаяпти, балки уларнинг барвақт олдини олиш учун тизим шакллантириляпти», — дейди вилоят ИИБ матбуот хизмати раҳбари.

Бошқарма бошлиғи Шуҳрат Алиев жиноятлар кўпроқ қандай шахслар томонидан содир этилаётганини ҳам айтди.

«Аниқланган жиноятлар сони ҳар соҳада ошган. Таълим, соғлиқни сақлаш, банк соҳаси, йўл ҳаракати қоидаларини қўпол равишда бузиш, гиёҳвандлик воситаларини сақлаш ёки ўтказиш, ахборот хавфсизлиги соҳаси ва ҳоказо. Лекин улар кўпроқ қандай шахслар томонидан содир этилмоқда? Биргина вояга етмаганлар томонидан содир этилган жиноятлар 60 тага ошган. Ёшлар томонидан содир этилган жиноятлар эса 447 тага, аёллар ўртасида 188 тага кўпайган», — деди Шуҳрат Алиев.

2019 йилда Бухоро вилоят ИИБ бошлиғи Шуҳрат Алиев Бухоро ёшлар марказида ўтказилган «Раҳбар ва ёшлар» учрашувида «Бухоро ёшлари Республикада бирорта ҳам жиноят содир этмайди, деб ишонаман», деганди.