Андижоннинг Хўжаобод ва Пахтаобод туманларига янги ҳоким тайинланди

Андижон вилоятининг Хўжаобод туманида бугун, 18 февраль куни Халқ депутатлари Хўжаобод тумани кенгашининг олтинчи чақириқ навбатдан ташқари йигирма олтинчи сессияси ўтказилди. Унда вилоят ҳокими Шуҳрат Абдураҳмонов иштирок этиб, ташкилий масала кўриб чиқилди, дея хабар берди «Дарё» мухбири.

Сессияда Андижон вилояти ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари лавозимида ишлаб келган Ўткирбек Шукуров Хўжаобод тумани ҳокими вазифасига номзод сифатида кўрсатилиб, депутатлар томонидан маъқулланган.

Ўткирбек Шукуров Андижон шаҳрида туғилган бўлиб, 2013—2017 йилларда собиқ «Камолот» ёшлар ҳаракати Марказий Кенгаши раиси, 2017—2019 йилларда Ёшлар иттифоқи раисининг ташкилий-кадрлар масалалари бўйича ўринбосари вазифаларида ишлаган.

У 2019 йил февраль ойидан буён Андижон вилояти ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари лавозимида ишлаб келаётганди.

Шунингдек, Андижон вилоятининг Пахтаобод туманига ҳам янги ҳоким тайинланган. Айни кунга қадар Марказий банкнинг вилоятдаги бош бошқармасига раҳбарлик қилиб келган Элёрбек Усмонов Пахтаобод тумани ҳокими сифатида иш бошлаган.

Андижон вилояти ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари лавозимига эса Насибулло Мўминов тайинланган.

Насибилло Мўминов 1983 йил Андижон туманида туғилган бўлиб, 2006 йилда Андижон муҳандислик иқтисодиёт институтини тамомлаган. Меҳнат фаолиятини 2001 йилда Андижон қурилиш техникумининг махсус фан ўқитувчиси вазифасидан бошлаган. Турли йилларда Андижон уй-жой ва коммунал хўжалиги касб-ҳунар коллежида бўлим бошлиғи, амалиёт ишлари бўйича, ўқув ишлари бўйича директор ўринбосари Андижон қурилиш ва транспорт касб-ҳунар коллежи директори, 2017—2018 йилларда Ўзбекистон Республикаси Вазирлар Маҳкамаси ҳузуридаги Таълим сифатини назорат қилиш давлат инспекцияси Андижон вилояти бўлими бошлиғи, 2018—2019 йиллар давомида эса Андижон вилояти ҳокимлиги касб-ҳунар таълими бошқармаси бошлиғи вазифаларида ишлаган.

У тайинловга қадар Касбий таълимни ривожлантириш ва мувофиқлаштириш бошқармаси бошлиғи ҳамда бир вақтнинг ўзида вилоят ҳокимининг жамоатчилик билан ишлаш бўйича маслаҳатчиси лавозимида ишлаб келаётган эди.