«Ёмон қиз» қўшиғи билан мухлислар қалбидан жой олган хонанда Имрон 13—14 февраль кунлари «Халқлар дўстлиги» санъат саройида илк яккахон концерт дастурини тақдим этди.
«Ёмон қиз» дастури 20 та қўшиқдан ташкил топди. Хонанда бироз ҳаяжонлангани туфайли аксарият қўшиқларини фонограмма орқали ижро этди. Аммо мухлислар учун қадрдон бўлган ва хонанданинг ташриф қоғозига айланган «Ёмон қиз» қўшиғини жонли ижрода куйлади.
Хонандани қўллаб-қувватлаш мақсадида концертга Ўзбекистон халқ артистлари Теша Мўминов, Эркин Комилов, Саида Раметова, сўз устаси Шукрулло Исроилов, хонанда Фарҳод Саидов, актёрлар Азиз Раметов ва Дурдона Қурбоновалар ташриф буюрди.
Концерт қадрдон ва янги қўшиқларга бой бўлди. Аммо актриса Дурдона Қурбонованинг сюрпризи кўпчиликка маъқул келди. Саҳнага мухлислар томонидан юборилган қути ичидан актриса Дурдона Қурбонова чиқиб, хонанда концертига таклиф этмасада, келганлигини айтиб ўтди. Аслида бу ҳазил томоша хонанда Имрон ғояси асосида яратилганди.
Бундан ташқари, концертда Раметовлар оиласи ҳам қатнашиб театрлашган саҳна кўринишини ижро этди.
«Бизни ҳурмат қилиб, ҳамкорликка таклиф этган ижодкорларга ҳеч қачон рад жавобини бермайман. Имрон ҳам концертида оилавий иштирок этиб, «жонли» клип саҳналаштириб беришимизни сўради. Бажонидил қабул қилдим. Аммо турмуш ўртоғим Жумадулла ака бетоблиги учун концертда иштирок этолмади», — дейди актриса Саида Раметова.
Актриса Дурдона Қурбонова концертда Имроннинг рафиқаси билан танишгани ҳақида сўзлаб берди.
«Келишмовчиликларни унутдик. Имрон ака клип олиш жараёнида концертида иштирок этишимни сўради. «Концертда нима қиламан, қўшиқ айтаманми?» деб ҳайрон бўлгандим. Кейин мухлислар учун кутилмаган томоша кўрсатишга қарор қилдик. Шу кунгача ҳеч бир хонанданинг клипида суратга тушишни истаб, ўзим мурожаат қилмаганман. Бирор нарса насиб этмаса, мен учун хайрли бўлмаганига ишонаман. Шу кунгача насиб этмаган роль ёки тарк этилган жамоа учун ачинмаганман. Имрон ака концертига таклиф этгани учун келдим. Клипига таклиф этмаганида ҳам хафа бўлмаганман. Шунчаки мухлисларнинг саволларига жавоб бериб, кастинг ва клип съёмкаси ҳақида ҳам эшитмаганимни айтгандим. Очиғини айтсам, менга «Хиёнат қилма» клипи ёқмаган, у ролда ўзимни тасаввур ҳам қилолмасдим. Чунки ўзбек аёллари ҳеч қачон осонликча хиёнат йўлини танлашмайди.Имрон ака уйлангач, албатта аёли билан танишишни ният қилгандим. Чунки одамлар ўртамиздаги келишмовчиликлардан сўнг мени оила бузғунчилигида айблашганди. Аммо менда ҳеч қачон бундай ният бўлмаган. Бугун илк марта Имрон аканинг аёли билан учрашиб, бироз суҳбатда бўлдим», — дейди Дурдона Қурбонова.
Эслатиб ўтамиз, хонанда Имрон 1990 йилнинг 5 май санасида Бухоро вилоятида таваллуд топган. Ижодий фаолиятини 2008 йилда бошлаган. 2008-2013 йилларда Ўзбекистон давлат консерваториясининг эстрада санъати бўлимида таҳсил олган. Шу кунгача 40 га яқин муаллифлик қўшиқларини яратган.
Изоҳ (0)