«E-qaror» — Маҳаллий давлат ҳокимият органлари томонидан қабул қилинадиган қарорларни ишлаб чиқиш, келишиш ва рўйхатдан ўтказишнинг ягона электрон тизими кўпчиликка ёқмаяпти. Бу ҳақда Ўзбекистон адлия вазири Русланбек Давлетов 7 февраль куни бўлиб ўтган жамоатчиликка берган анъанавий йиллик ҳисоботи давомида айтиб ўтди, деб хабар беради «Дарё» мухбири.
«Барча ҳокимликларнинг қарорлари «E-qaror» тизимида шаффоф чиқишни бошлади. Уни ҳамма кўриб, резонанслар бўлишни бошлади. Бюджетдан қанча пул ажратилаётгани кўриняпти. Бизга ҳам буни назорат қилиш осон бўлди. Аввал бориб текширардик, қоғоз ҳужжатни олиб юриш керак эди. Энди биз барчасини кўриб турамиз. Ёпиқ ҳужжатлар ҳам бор, масалан, васиятнома ва бошқалар. Шу каби маҳаллий бюджет харажатларни ҳам ёпиш каби ҳолатлар бор. Улар буни кўрсатгиси келмайди-да, ‘битта ҳайкалга шунча пулми?’, деб жамоатчилик кўтаришини билади-да», — дейди у.
Русланбек Давлетов бу каби масалаларни кўтариш кераклиги ҳақида айтиб ўтди. Унинг таъкидлашича, «балки биз бу орқали қадриятларизни тўғри йўлга қўйиб олармиз».
«Яъни қайси томонга пул кетказиш кераклигини. Ҳайкал ҳам керакдир, лекин бошқа йўналишларда ҳам керак бўлиши мумкин. Кўп одамга ҳам ‘E-qaror’ тизими ёқмаяпти. Биз бу борада қаттиқ турибмиз. Шундан келиб чиқиб бу тизимни вазирликларга ҳам тадбиқ қилмоқчимиз. Вазирликлар ҳам жуда кўп пул сарфлайди, ‘жуда кўп ишларни қилади’», — дейди адлия вазири.
Русланбек Давлетовнинг қўшимча қилишича, ҳокимликларнинг 2500та ноқонуний қарори аниқланган. «Бу жуда катта рақам», дейди вазир.
Ҳокимликлардан маъмурий ислоҳотлар сўралганда, Адлия вазирлиги танқид қилингани ҳам қайд этилди.
«Айрим ҳокимлар айтяпти, ‘бу Адлия тизимидагилар фақат саккиз соат ишлайди, бошқа иш қилмайди’. Қонун бўйича ўзи 8 соат ишланиши керак-ку, кўряпсизми, айрим раҳбарларнинг қадриятлари қандай? Конституцияда ёзилган меҳнат ҳуқуқи бўлса, Меҳнат кодексида ёзилган нормалар бўлса, 8 соат ишлашни танқид сифатида мажлисларда гапириш — бу энди қай даражада қолоқликдан иборат бўлган ҳодиса эканини англатади. Ҳар доим айтамиз, ҳудудлардаги ёки соҳадаги раҳбарлар ҳудуд ёки соҳадаги бек эмас, ўзи халқнинг ёлланма ишчиси эканини тан олса, қадами ўзгаради. Биз ҳам ёлланма ишчимиз. Қонун турибди ва қонундан ҳеч ким устун бўлолмайди», — дейди Русланбек Давлетов.
Изоҳ (0)