Хоразм вилояти божхона бошқармасининг «Урганч аэропорти» чегара божхона постида 22 минг 900 долларни белига боғлаб, олиб чиқишга уринган шахс тўхтатиб қолинди.
Давлат божхона қўмитаси матбуот хизмати хабарига кўра, қўшни давлатга парвози олдидан божхонадан «яшил» йўлак орқали ҳаракатланган йўловчилардан бирининг безовталаниши божхона ходимларининг диққатини тортган.
Шундан сўнг ушбу шахс белгиланган тартибда кўздан кечирилганида, кийимлари остида белига махсус тиббий белбоғ боғлаб олгани аниқланган. Белбоғга эса чўнтаклар тикилган бўлиб, уларда божхона ходимларининг оғзаки сўровида ва йўловчи божхона декларациясида маълум қилинмаган 22 минг 900 доллар яширилган бўлган.
Мазкур ҳолат юзасидан йўловчига нисбатан Жиноят кодексининг тегишли моддасига биноан жиноят иши қўзғатилди.
Амалдаги тартибларга кўра, жисмоний шахсларга 100 миллион сўм эквивалентидаги нақд хорижий валюталарни Ўзбекистондан эркин олиб чиқишларига рухсат этилади.
Аввалроқ Андижонда қарийб 1,6 миллион долларни ноқонуний равишда хорижга чиқаришга уринган жиноий гуруҳ фаолиятига чек қўйилгани ҳақида хабар берилган эди.
Изоҳ (0)