Самарқанд вилоятининг Нарпай туманида электр энергиясидан ноқонуний фойдаланиб келган корхона фаолиятига чек қўйилди, деб хабар беради Бош прокуратура ҳузуридаги департамент.
Маълум қилинишича, департаментнинг Нарпай тумани бўлими томонидан терговга қадар текширув ўтказилган. Текширув давомида «А.О.» оилавий корхонаси раҳбари С.И. пайвандлаш ва бошқа ускуналарни тўғридан-тўғри электр тармоғига улаб, электр энергиясидан ноқонуний фойдаланиб келгани аниқланган. Мазкур ноқонуний хатти-ҳаракатлар натижасида давлат ва жамият манфаатларига 830,3 миллион сўм зарар етказилган.
Шунингдек, Пахтачи туман бўлими томонидан ўтказилган терговга қадар текширувда фуқаро И.Б. ўз хонадонида тошни кесиш, ишлов бериш ва пардозлаш хизматини кўрсатиш учун «Ф.Б.» оилавий корхонасини ташкил этгани аниқланган. У корхонага тегирмон ва бошқа ускуналарни ўрнатиб, электр таъминоти корхонаси рухсатисиз, ўзбошимчалик билан электр тармоғига уланиб фойдалангани натижасида давлат ва жамият манфаатларига 133,8 миллион сўм зарар етказилган.
Мазкур ҳолатлар юзасидан Жиноят кодексининг 185-2-моддаси (электр, иссиқлик энергияси, газ, водопроводдан фойдаланиш қоидаларини бузиш) билан жиноят ишлари қўзғатилиб, тергов ҳаракатлари ўтказилмоқда.
Аввалроқ Фарғонада 2021 йилда деярли 6 млрд сўмлик электр энергияси ўғирлангани, Ўзбекистонда 2021 йилнинг 11 ойида 107 мингта аҳоли хонадонининг 1 ойлик истеъмолига тенг электр энергиясидан ноқонуний фойдаланилгани тўғрисида хабар берилганди.
Изоҳ (0)