Samarqand viloyatining Narpay tumanida elektr energiyasidan noqonuniy foydalanib kelgan korxona faoliyatiga chek qo‘yildi, deb xabar beradi Bosh prokuratura huzuridagi departament.
Ma’lum qilinishicha, departamentning Narpay tumani bo‘limi tomonidan tergovga qadar tekshiruv o‘tkazilgan. Tekshiruv davomida “A.O.” oilaviy korxonasi rahbari S.I. payvandlash va boshqa uskunalarni to‘g‘ridan to‘g‘ri elektr tarmog‘iga ulab, elektr energiyasidan noqonuniy foydalanib kelgani aniqlangan. Mazkur noqonuniy xatti-harakatlar natijasida davlat va jamiyat manfaatlariga 830,3 million so‘m zarar yetkazilgan.
Shuningdek, Paxtachi tuman bo‘limi tomonidan o‘tkazilgan tergovga qadar tekshiruvda fuqaro I.B. o‘z xonadonida toshni kesish, ishlov berish va pardozlash xizmatini ko‘rsatish uchun “F.B.” oilaviy korxonasini tashkil etgani aniqlangan. U korxonaga tegirmon va boshqa uskunalarni o‘rnatib, elektr ta’minoti korxonasi ruxsatisiz, o‘zboshimchalik bilan elektr tarmog‘iga ulanib foydalangani natijasida davlat va jamiyat manfaatlariga 133,8 million so‘m zarar yetkazilgan.
Mazkur holatlar yuzasidan Jinoyat kodeksining 185-2-moddasi (elektr, issiqlik energiyasi, gaz, vodoprovoddan foydalanish qoidalarini buzish) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Farg‘onada 2021-yilda deyarli 6 mlrd so‘mlik elektr energiyasi o‘g‘irlangani, O‘zbekistonda 2021-yilning 11 oyida 107 mingta aholi xonadonining 1 oylik iste’moliga teng elektr energiyasidan noqonuniy foydalanilgani to‘g‘risida xabar berilgandi.
Izoh (0)