Toshkent shahri Chilonzor tumanida 24-yanvar kuni omborxonalarning birida yong‘in chiqqani xabar qilingandi. “Milliy” telekanalining xabar qilishicha, voqeani yoritishga kelgan telekanal xodimlari noma’lum shaxslar tomonidan kaltaklandi.
Qayd etilishicha, 24-yanvar kuni soat 09:58 da tumanning Bunyodkor ko‘chasida joylashgan omborxonada yong‘in bo‘layotgani to‘g‘risida tuman FV bo‘limiga xabar kelib tushgan. Shunga ko‘ra, 10 ta yong‘in-qutqaruv ekipaji voqea joyiga yetib borgan. Hodisa oqibatida jabrlangan va halok bo‘lganlar yo‘q.
“Milliy” telekanalining “Millar” dasturi muxbiri va tasvirchilari FVB xodimlari ruxsati va inspektorning nazorati bilan voqea joyidan reportaj tayyorlashga kirishgan. Shu payt OAV xodimlari kaltaklangan.
“Birdan noma’lum shaxslar tasvirchiga tashlanib, 5-6 kishi urib tashladi. Hamma joyi qon bo‘lib yotibdi, labi yirtilgan. O‘zim shokka tushib qoldim, mikrofonimni olib, zo‘rg‘a tashqariga chiqishga ulgurdim”, — deydi muxbir.
Do‘pposlagan shaxslar, shuningdek, xodimlarning kameralarini ham olib qo‘ygan.
Jabrlanuvchilar holat yuzasidan Chilonzor tumani ichki ishlar bo‘limiga ariza bilan murojaat qilgan.
“Daryo” so‘roviga ko‘ra, Bosh prokuror matbuot kotibi Hayot Shamsutdinov vaziyat bo‘yicha ma’lumot berdi. Unda aytilishicha, “Milliy” telekanali tasvirga olish guruhi xodimlari holatni videolavhaga olayotgan vaqtida ularga omborxona ishchi xodimlari va ularga o‘t o‘chirishda yordamlashayotgan shaxslar faol qarshilik ko‘rsatib, tan jarohati yetkazgan. Oqibatda M.A. (2000-yilda tug‘ilgan) va H.O. (2001-yilda tug‘ilgan) ismli muxbirlar jabrlangan.
Huquqbuzarlik holatini U.Z. (1990-yilda tug‘ilgan) va A.G‘ (1985-yilda tug‘ilgan) ismli tadbirkorlar sodir etgani aniqlangan.
Hozirda qo‘shimcha surishtiruv harakatlari olib borilmoqda. Mavzuga doir:- OAV: Ishtixon hokimligi matbuot xizmati xodimi jurnalist kamerasining fleshkasini “yeb qo‘ydi”
- Surxondaryoda maktab direktori jurnalist kamerasiga shikast yetkazdi. Holat bo‘yicha rasmiy munosabat bildirildi
- Qarshida IIB xodimi “Daryo” muxbiriga qo‘pollik bilan tahdid qildi. IIV vaziyat o‘rganib chiqilishini ma’lum qildi
