Россияда бир суткада 113 минг кишида коронавирус аниқланди — бу пандемия бошидан буён мутлақ рекорд

Россияда охирги сутка давомида 113 122 кишида коронавирус тасдиқланди, деб хабар бермоқда COVID-19 га қарши кураш бўйича федерал тезкор штаб. Пандемия бошидан буён биринчи марта мамлакатда ушбу инфекция билан кунлик касалланишлар сони олти хонали рақамларни кўрсатмоқда.

Хабарга кўра, 28 январь куни 14 570 киши коронавирус билан касалхонага ётқизилган, 668 нафар бемор вафот этган. Энг кўп касалланиш ҳолатлари Москва (26 488 киши), Санкт-Петербург (14 939) ва Москва вилоятида (10 725) қайд этилган.

Оператив штаб маълумотларига кўра, Россияда сўнгги 24 соат ичида 30 010 киши касалликдан соғайган.

Пандемия бошидан бери штаб COVID-19 га чалиниш бўйича 11 615 779 та ҳолатни рўйхатга олган, жами 330 111 киши инфекция қурбони бўлган.

Умуман олганда, Россияда коронавирус билан кунлик касалланишлар сони бир ҳафтадан буён тинимисиз рекорд ўрнатмоқда. 27 январь куни мамлакатда 98 040 кишида коронавирус аниқланганди.

Шунингдек, бир суткада инфекцияга чалинганлар сони 26 январь ҳолатига 88 816 кишини, 25 январь ҳолатига 74 692 кишини, 24 январь ҳолатига 65 109 кишини, 23 январь ҳолатига 63 205 кишини, 22 январь ҳолатига 57 212 кишини ташкил этган.

Россияда коронавируснинг янги тўлқини омикрон штамми тарқалиши фонида бошланди. Аввал «Роспотребнадзор» раҳбари Анна Попов вазият ёмонлашса, кунлик касалланишлар сони 100 минг кишидан ошиши мумкинлигидан огоҳлантирган эди.

Кремль мамлакатда локдаун жорий этиш учун ҳозирча ҳеч қандай сабаб кўрмаётганини билдирган. Президент матбуот котиби Дмитрий Песковнинг таъкидлашича, омикрон тарқалиши фонида, касалланганлар сонига эмас, балки касалхонага ётқизиш кўрсаткичларига эътибор қаратиш муҳимроқ. «Ҳозирча бу йўналишда ‘портлаш’ кузатилмаяпти», — дея қўшимча қилган у.