Олмалиқ кон-металлургия комбинати мамлакатимизнинг энг йирик ишлаб чиқариш корхоналаридан бири ҳисобланади. Комбинат конларни очиқ ва ерости усулида қазиш, бойитиш ва олтинни саралаб олиш фабрикалари, металлургия заводлари, йирик энергетика ва транспорт тизимлари, ривожланган инфратузилма ҳамда ижтимоий объектларни бирлаштирган. Ишлаб чиқариш ҳажми ва иш самарадорлигини янада ошириш мақсадида, корхона фаолиятининг барча йўналишларини рақамлаштириш бўйича бир қатор йирик лойиҳалар амалга оширилмоқда.
Маълумки, Ўзбекистон Республикаси Президенти Шавкат Мирзиёев томонидан, 2020 йил 5-октябрь куни «‘Рақамли Ўзбекистон — 2030’ стратегиясини тасдиқлаш ва уни самарали амалга ошириш чора-тадбирлари тўғрисида»ги фармон имзоланган. Фармон билан тасдиқланган «Рақамли Ўзбекистон — 2030» миллий стратегияси доирасида комбинат мутахассислари томонидан «Рақамли ОКМК — 2030» ривожланиш концепцияси ишлаб чиқилган.
Ушбу йўналишдаги асосий ишлар ишлаб чиқаришни автоматлаштириш бошқармаси томонидан амалга оширилмоқда. Бугунги кунга келиб, бошқармада 282 нафар ходим фаолият олиб бормоқда. Улар томонидан 4000 дан зиёд компьютер ва ташкилий техникалар, 62 та сервер ускуналари, 37 та ахборот тизимлари ва ресурсларига доимий равишда хизмат кўрсатиб келинмоқда.
Бошқарманинг вазифаларидан бири — корхонанинг барча бўлимлари ахборот тизимлари ва автоматлаштириш тизимларининг барқарор ва муаммоларсиз ишлашини таъминлаш. Бошқарма мутахассислари комбинат ишлаб чиқариш самарадорлигини ошириш имконини берувчи махсус компьютер дастурларини яратиш ва татбиқ этиш бўйича бир қатор ишларни амалга ошириб келмоқда.
Ҳозирги кунда маълумотларни қайта ишлаш марказини модернизация қилиш ишлари якунланган, янги сервер ускуналари ўрнатилган, географик жиҳатдан узоқлаштирилган захира маълумотлар маркази яратилган. Мавжуд компьютер парки, серверлар ва алоқа тизимларини доимий равишда модернизация қилиб бориш режалаштирилган.
ОКМКда IT лойиҳаларни жорий этиш корхонада олиб борилаётган рақамли трансформациялашнинг асосий босқичи ҳисобланади. Амалга оширилаётган ишлар авваламбор мавжуд маълумотлар юритиш тизимини қоғоз кўринишдан рақамлига ўтказиш, натижада барча жараёнлар электрон кўринишга келтиришга қаратилган.
«Рақамли ОКМК — 2030» концепциясига мувофиқ белгилаб қўйилган вазифалар захира маълумотлар марказини яратишни ҳисобга олган ҳолда мавжуд сервер инфратузилмасини, ОКМКнинг таркибий бўлинмаларида маҳаллий ҳисоблаш тармоғини, мавжуд компьютерлар базасини ва алоқа тизимларини модернизация қилиш ишларини қамраб олади. Шу билан бирга, комбинатнинг узоқ масофада жойлашган корхона ва бўлинмалари ҳам ягона корпоратив тармоққа уланади.
Ушбу ёндашув нафақат замонавий компьютер техникаси ёки дастурий таъминотини ўрнатишни, балки жараёнлар, бошқарув тизими, корпоратив маданият ва ташқи алоқалардаги туб ўзгаришларни ҳам назарда тутади. Натижада ишлаб чиқаришнинг унумдорлиги ва маҳсулот сифатининг сезиларли даражада ошишига эришилади.
Рақамлаштириш лойиҳаларидан бири сифатида кон-геологик ахборот тизимини ишлаб чиқиш ва амалга ошириш лойиҳасини кўрсатиб ўтиш мумкин. Махсус дастурий таъминот ёрдамида маркшейдерлар, геолог ва кончилар маълум участкада қандай таркибга эга руданинг борлигини тушуниши учун конлар, карер ва ерости шахталарининг 3D моделларини яратиш имкониятига эга бўлишди. Бу иш фронтини режалаштириш, қайта ишлаш фабрикаларига жўнатилган рудалар сифати бўйича тегишли кўрсаткичларга эришиш учун техникани мақбул тарзда тақсимлаш имконини беради.
Яқин вақт ичида корхонанинг ерости шахталарида диспетчерлик ва хавфсизлик тизимлари жорий этилади. Тизим комбинатнинг барча шахталарида босқичма-босқич ўрнатилади. Натижада ерости ишлари доимий равишда назорат қилиб борилади, ходимларнинг шахтадаги иши кўриб борилади, ер остидаги ишчилар билан доимий алоқа таъминланади, фавқулодда вазиятларнинг олди олинади.
Комбинатда ишлаб чиқариш жараёнини бошқариш учун МЕС тизими жорий этилмоқда. Тизим маълумот манбалари билан интеграциялашган бўлиб, реал вақт режимида ишлаб чиқариш жараёни ҳақида тезкор маълумотларга эга бўлиш имконини беради. МЕСдан фойдаланиш маҳсулот ишлаб чиқаришни кўпайтириш, унинг хусусиятлари барқарорлигини ва сифат даражасини ошириш учун шароит яратади.
Яқин келажакда корхонанинг молия, ғазначилик ва савдо фаолиятини тўлиқ автоматлаштиришга йўналтирилган ERP тизимини жорий этиш кўзда тутилган. ERP жорий этилгандан сўнг комбинатда фойдаланилаётган ахборот тизимлари ягона тузилма доирасида ишлайди. Бу эса турли маълумотлар манбалари ўртасидаги зиддиятларни бартараф этади.
Комбинатнинг қурилиш объектларини лойиҳалаштиришда эса БИМ технологиясига ўтиш режалаштирилган. Унинг ўзига хослиги шундаки, яхлит тарзда ишлаб чиқилган қурилиш объектининг ҳар қандай параметрларини ўзгартириш у билан боғлиқ барча нарса: чизмалар, визуализация, спецификациялаш ва ҳаттоки тақвим жадвали автоматик равишда ўзгаришига олиб келади. Бу эса қурилиш сифатини оширади.
ОКМКнинг ишлаб чиқаришини рақамлаштириш чора-тадбирларини амалга ошириш келгусида IT инфратузилмани янада ривожлантириш, ходимларнинг рақамли саводхонлигини оширишни ҳам ўз ичига олади.
Рақамлаштириш лойиҳалари амалга оширилгандан сўнг маҳсулот сифати ва ҳажми ошади, фойда миқдори сезиларли даражада кўпаяди, ходимларнинг иш юкламасини камаяди. Бундан ташқари, маълумотларнинг тартибга солинганлиги ва шаффофлиги туфайли корхонанинг хорижий инвесторларни жалб қилиш имкониятлари ошиб, халқаро лойиҳаларда иштирок этиш учун шароит яратилади.
Маълумот шериклик ҳуқуқи асосида тайёрланди.
Изоҳ (0)