Ўзбекистонлик боксчи Шоҳжаҳон Эргашев фаолиятини якунлагани ҳақида хабар берилганди.
Ушбу хабарга боксчи Шаҳрам Ғиёсов ўз муносабатини билдирди:
«Сен билан тугалланмаган жангимиз бор эди, ўртоқ, лекин фаолиятингни якунлабсан. Омад тилайман. Агар қайтиш нияти бўлиб қолса, кутаман».
Ўз навбатида Шоҳжаҳон Эргашев ҳам бунга жавоб қайтарган.
«Мен ҳам сени учратганимдан хурсандман. Спортдаги фаолиятингни ҳурмат қиламан. Жуда кучли боксчисан. Албатта, мен ҳам сен билан жанг қилишни хоҳлар эдим, афсуски, боксни ташладим. Лекин отам билан гаплашишим керак, агар у менга рухсат берса, жанг қилишга тайёрман. Аммо тайёргарлигинг юқори бўлсин. Сен билан ҳисобни ёпиб, боксни тамомлашни истар эдим.
Сенинг ҳам келгуси ишларингга омад».
Эслатиб ўтамиз, Шоҳжаҳон Эргашев 24 январь куни боксдаги фаолиятини якунлаганини эълон қилди. Спортчи шу вақтга қадар проф боксда жами 21 та жанг ўтказган ва уларнинг барчасида ғалаба қозонган. 19 та жангда эса рақибларини нокаут эвазига таслим қилган. Эргашев сўнгги марта 2021 йилнинг 11 декабрида рингга кўтарилганди.
Шаҳрам Ғиёсовнинг профессионал боксдаги статистикаси эса қуйидагича — 12-0, 9 КО. У охирги жангини 2021 йилнинг 17 декабрь куни Тошкентда бўлиб ўтган бокс кечасида аргентиналик Кристиан Кориага қарши ўтказганди.
Янада кўпроқ футбол ва спорт янгиликларидан boxабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)