26 январь куни Греция пойтахти Афина марказидаги турар жой биносида портлаш ва ёнғин содир бўлди. Оқибатда бир қанча бинолар зарар кўрди, бир киши жароҳат олди, деб ёзади Athens 24.
Фото: Twitter
Ўт ўчириш бўлими маълумотларига кўра, портлашга катта эҳтимол билан газнинг сизиб чиқиши сабаб бўлган. Маълум қилинишича, уйнинг бир қисмида аҳоли яшамаган.
Ёнғин тезда ўчирилган. Портлаш зарбаси биринчи қаватдаги озиқ-овқат дўкони жойлашган бутун бинога, шунингдек, рўпарадаги бинога жиддий зарар етказган.
200 метр масофада жойлашган уйларнинг ойналари синган, иккита машина шикастланган. 78 ёшли эркак тан жароҳати олиб, касалхонага ётқизилган. Портлаш содир бўлган жойга Греция полициясининг портловчи моддаларни зарарсизлантириш гуруҳи етиб келган.
Аввалроқ Ганада содир бўлган кучли портлаш оқибатида 500 дан ортиқ бино вайрон бўлганди. Фожиа оқибатида камида 17 киши ҳалок бўлган.
Шунингдек, Афғонистон шарқида юз берган портлашда 9 нафар мактаб ўқувчиси ҳалок бўлгани, Нью-Йоркда газ портлаши оқибатида кўп қаватли уйнинг бир қисми қулаб тушгани, Гаитида ёнилғи ортилган автоцистерна аварияга учраб, портлаши оқибатда 40 дан ортиқ одам ҳалок бўлгани тўғрисида хабарлар берилганди.
