АҚШ йирик компаниялар — энергия ресурсларни ишлаб чиқарувчилар билан Европа Иттифоқига газ етказиб бериш масаласини муҳокама қилмоқда. Бу ҳақда президент Жо Байден администрациясининг вакили маълум қилди, деб хабар беради Reuters.
У гап айнан қайси компаниялар ҳақида кетаётганига ойдинлик киритмаган, бироқ консультациялар суюлтирилган газ ишлаб чиқарувчилар билан кетаётганини таъкидлаган. «Биз дунёнинг турли минтақаларида — Шимолий Африка ва Яқин Шарқдан Осиё ва АҚШгача Россияга тегишли бўлмаган қўшимча табиий газ ҳажмларини аниқлаш устида иш олиб боряпмиз», — дейди администрация вакили.
«Шунга кўра биз дунёдаги йирик газ ишлаб чиқарувчилар билан музокаралар ўтказиб, уларнинг табиий газ қазиб олиш ҳажмини вақтинча ошириш ва ушбу ҳажмларни Европадаги харидорларга тақсимлаш имкониятини кўриб чиқяпмиз», — дея қўшимча қилади у.
Кейинроқ Оқ уй вакили Жен Псаки АҚШ Россия газ етказиб беришни тўхтатиб қўйган тақдирда Европа учун муқобил газ манбаларини топиш устида иш олиб бораётганини тасдиқлаган. Унинг сўзларига кўра, Россия томонидан ёнилғи етказиб берилишининг қисқартирилиши Қўшма Штатлардаги нархларга минимал босим кўрсатади.
Эслатиб ўтамиз, январь ойи ўрталарида Европада табиий газнинг биржа нархлари яна кўтарилиб, минг куб метр учун 1,1 минг доллардан ошиб кетди. Бунгача, декабрь ойи охирида ёнилғи нархи тарихий максимум даражага кўтарилганди (21 декабрда минг куб метр учун 2190,4 доллар), ундан кейин эса 1000 долларгача тушган.
Изоҳ (0)