2022 йилнинг 25 январь куни соат 11:00 ларда Ўзбекистоннинг қатор вилоятларида электр энергияси таъминоти узилди.
«Дарё» мухбири Тошкент шаҳри аҳолиси ва пойтахт меҳмонларидан бир неча соат электрсиз қолиш уларнинг иши ва ҳаётига қанчалик таъсир қилгани ҳақида сўради.
Сотувчи аёлнинг таъкидлашича, у электр энергиясидаги узилиш туфайли савдо қилолмаган.
«Лавашхонамда ҳеч нарса сотолмаяпман, савдо қилганим йўқ, ҳамма нарсам турибди. Чироқ ўчиши бизга минус бўлади-да, бошқа нима бўларди», - дейди аёл.
Қурилиш ташкилотларидан бирини бошқарувчи эркак саволга жавоб бераркан, шундай деди: «Уйларни таъмирлаш билан шуғулланамиз. Бугун қурилишда ишлатиладиган техникалар ишламади, биз анча пул йўқотдик. Чунки қўлимизда анча ишчилар ишлайди».
Йўловчилардан бири «Чироқ ўчса, яхши-ку, свет, телефон ишламаса зўр-ку», дея фикр билдирди.
Жиззахдан Тошкентга келган аёл Ўзбекистон пойтахтида чироқ ўчганидан ҳайрон қолганини қайд этди.
«Соғлиғимни текширтириш учун Жиззахдан Тошкентга келган эдим. Чироқ йўқлиги боис лаборатория ишламади. Шу сабабли қон таҳлили натижасини билолмадим. Фақат шу қолди холос. Тошкентга атай келгандим. Пойтахтимизда свет ўчганига ҳайрон қолдим», - дейди у.
Ўзбекистонда кузатилган электр энергиясининг йирик носозлиги хронологияси
25 январь куни соат 11:00 ларда Ўзбекистоннинг қатор вилоятларида электр энергияси таъминоти узилди. Тошкент метрополитени фаолияти ҳам тўхтаган, Республикадаги барча поездлар ўз манзилларига кечикиб етиб бориши айтилмоқда. Тошкент шаҳар ИИББ эса тибандликларнинг олдини олиш мақсадида кўчага зарурат бўлмаса, шахсий машинада чиқмасликни тавсия қилмоқда.Энергетика вазирлиги маълумотларига кўра, ҳозирда Тошкент вилоятидаги Чорвоқ, Ҳожикент ва Товоқсой гидроэлектр станциялари, Навоий вилоятидаги Навоий иссиқлик электр станцияси, Қорақалпоғистон Республикасидаги Тахиатош иссиқлик электр станцияси ҳамда Фарғона вилоятидаги Фарғона иссиқлик электр маркази орқали энергетика тизимига қувват узатиш бошланган. «Дарё» нашри ходимлари ва ўқувчиларининг хабар беришича, Тошкент шаҳрининг айрим ҳудудларида электр таъминоти тикланган.
Кейинроқ Президент матбуот котиби Шерзод Асадов «вазият шахсан президент назорати остида» эканини маълум қилиб, фуқароларни саросимага тушмасликка чақирди. Шавкат Мирзиёев топшириғи билан электр энергиясида кузатилаётган носозлик бўйича комиссия тузилди. Энергетика вазирлиги Қорақалпоғистон ва Хоразмда электр энергияси тўлиқ тикланганини хабар қилди. Тошкент шаҳри ва Сирдарё вилоятининг бир қатор ҳудудларида ичимлик суви таъминоти тикланди. Тошкент ИЭСнинг фаолияти қисман тикланиб, 7 та энергоблокдан 5 таси барқарор иш фаолиятига келтирилди.
Энергия танқислиги ортидан Ўзбекистон Афғонистонга электр энергияси етказиб беришни тўхтатди. Газли, Шўртан ҳамда Муборак нефть ва газ қазиб чиқариш бошқармаларидаги 64 та кон фаолиятини вақтинча тўхтатди.
ССВ Зангиота ковид-марказларидаги электр энергияси билан боғлиқ ҳолат юзасидан маълумот берди.
Изоҳ (0)