ДХХ Сурхондарё вилояти бўйича бошқармаси ва вилоят ички ишлар бошқармаси ходимлари ҳамкорлигида ўтказилган тезкор тадбирда Абдуллоҳ Зуфарларнинг ақидапарастлик ғояларини тарғиб қилиб келган шахс ушланди.
ЎзАнинг ёзишича, вилоятнинг Узун туманида яшовчи Р.С. Telegram орқали «Араб тили дарси» номли канал ташкил этиб, унинг аъзоларига араб тилини ўргатиш баҳонасида Абдуллоҳ Зуфар ва бошқа номаълум шахслар маърузасини, даъватларини жойлаштириб, тарқатиш ҳамда тарғиб қилиш билан шуғулланиб келаётгани аниқланган.
Вилоят ИИБ матбуот хизмати маълумотига кўра, ушбу ҳолат процессуал тарзда расмийлаштириб олингач, Дин ишлари бўйича қўмитанинг экспертиза хулосаси олинган. Жойлаштирилган материаллар орасида қонунчиликда тақиқланган ақидапарастлик ғоялари билан йўғрилган маърузалар мавжудлиги маълум бўлган.
Мазкур ҳолат бўйича ДХХ Сурхондарё вилояти бошқармаси томонидан жиноят иши қўзғатилиб, тергов ҳаракатлари олиб борилмоқда.
Эслатиб ўтамиз, 2021 йилнинг майида ИИВ бир гуруҳ шахслар қаторида Абдуллоҳ Зуфарга нисбатан қидирув эълон қилганди. Июнда эса ИИВ Ўзбекистондаги конституциявий тузумни ағдаришга даъват қилган ушбу шахснинг аниқ манзилини айтган шахсларга мукофот пули берилишини маълум қилганди.
