Oliy sud Toshkentda Facebook ijtimoiy tarmog‘ida taqiqlangan materiallarni joylagan fuqaro M.M.ga nisbatan qamoqqa olish tarzidagi ehtiyot chorasi qo‘llanilganiga oid tarqalgan xabarlar yuzasidan rasmiy ma’lumot berdi.
Post muallifining yozishicha, Yunusobod tumani Terrorizmga qarshi kurashish xodimlari ayolni uyidan olib ketgan va hozirda u “Toshturma”da saqlanmoqda.
Jinoyat ishi hujjatlariga ko‘ra, M.M. o‘zining dinga bo‘lgan qiziqishi zamirida, internetning Facebook ijtimoiy tarmog‘ida mavjud bo‘lgan “Ummu Amina” nomli profili sahifasiga boshqa tanishlari ham ko‘rishlari uchun Sodiq Samarqandiy, Abdulloh Zufar va Abduvali Mirzayevning aqidaparastlik g‘oyalari bilan yo‘g‘rilgan diniy materiallarini joylashtirib, namoyish qilish orqali tarqatib kelayotgani aniqlanib, uning profilidagi videolahvalar xolislar ishtirokida bayonnoma orqali ko‘chirib olingan.
Ma’lum qilinishicha, Yunusobod tuman prokurori tomonidan Jinoyat kodeksining 244-1-moddasi (jamoat xavfsizligi va jamoat tartibiga tahdid soladigan materiallarni tayyorlash, saqlash, tarqatish yoki namoyish etish) 3-qismi “g” bandida nazarda tutilgan jinoyatni sodir etganlikda gumon qilingan M.M.ga nisbatan qamoqqa olish tarzidagi ehtiyot chorasini qo‘llash haqidagi iltimosnoma jinoyat ishlari bo‘yicha Yunusobod tuman sudiga kiritilgan.
2021-yil 11-sentabr kuni jinoyat ishlari bo‘yicha Yunusobod tuman sudi tomonidan tuman prokurorining qamoqqa olish tarzidagi ehtiyot chorasini qo‘llash haqidagi iltimosnomasi rad etilgan.
Jinoyat ishlari bo‘yicha Yunusobod tuman sudining 2021-yil 11-sentabrdagi ajrimiga nisbatan Yunusobod tuman prokurori tomonidan apellyatsiya protesti keltirilgan. Ushbu protest belgilangan tartibda ko‘rib chiqilib, qanoatlantirilgan.
Toshkent shahar sudi jinoyat ishlari bo‘yicha sudlov hay’ati apellyatsiya instansiyasi tomonidan M.M. og‘ir jinoyat sodir etganlikda gumon qilingan. Uning dastlabki tergov va suddan bo‘yin tovlab yashirinishi mumkinligi, u ochiqda qolgan taqdirda jinoyatga aloqador dalillarni yo‘q qilishi, guvohlarni ko‘ndirishi va boshqa qonunga xilof harakatlar bilan dastlabki tergov jarayoniga to‘sqinlik qilishi, ish bo‘yicha haqiqatni aniqlashga halal beradigan urinishlar sodir etishi va qayta yangi jinoyatlar sodir etishi mumkinligi inobatga olingan. Shu munosabat bilan M.M.ga nisbatan qamoqqa olish tariqasidagi ehtiyot chorasini qo‘llash lozim, degan xulosaga kelingan.
Ta’kidlanishicha, M.M.ni IIV Jazoni ijro etish bosh boshqarmasiga qarashli 1-sonli tergov hibsxonasiga joylashtirish belgilangan.
Eslatib o‘tamiz, 2021-yilning mayida IIV Sodiq Samarqandiy, Abdulloh Zufar va yana sakkiz kishiga nisbatan qidiruv e’lon qilgandi. Iyunda esa IIV O‘zbekistondagi konstitutsiyaviy tuzumni ag‘darishga da’vat qilgan Abdulloh Zufarning aniq manzilini aytgan shaxslarga mukofot puli berilishini ma’lum qilgandi.
Izoh (0)