Вазирлар Маҳкамаси 18 январда «Орол денгизининг суви қуриган тубида ва Оролбўйи ҳудудларида ‘яшил қопламалар’ — ҳимоя ўрмонзорларини барпо этишнинг қўшимча чора-тадбирлари тўғрисида»ги қарори қабул қилди. Бу ҳақда Дунё ахборот агентлиги хабар қилди.
Қайд этилишича, ҳужжат Ўзбекистонда ўрмон хўжалиги тизимини 2030 йилгача ривожлантириш концепциясига мувофиқ ишлаб чиқилган. Мазкур қарор билан қуйидагилар тасдиқланган:
- 2022—2026 йилларда Орол денгизининг суви қуриган туби ва Оролбўйи ҳудудларида «яшил қопламалар» — ҳимоя ўрмонзорларини барпо этиш ҳажмлари;
- 2022—2026 йилларда Орол денгизининг суви қуриган туби ва Оролбўйи ҳудудларида «яшил қопламалар» барпо этиш учун чўл ўсимликлари уруғларини тайёрлаш ҳажмлари.
Ўрмон хўжалиги давлат қўмитаси уларнинг ўз муддатида барпо этилиши бўйича доимий мониторинг юритади. Орол денгизининг қуриган тубидаги тупроқ таркибини инобатга олиб чўл ва шўр тупроққа мослашган ўсимлик турлари, шу жумладан, қумли ерларда черкез ҳамда шўр ҳудудларда тамарикс ва атриплекс (лебеда) ўсимликлари экилади. Қарорга биноан, қуйидагилар «яшил қопламалар» барпо этиш бўйича тадбирларни молиялаштириш манбалари этиб белгиланган:
- юридик ва жисмоний шахсларнинг ҳомийлик хайриялари;
- қонунчилик ҳужжатларида тақиқланмаган бошқа манбалар.
Изоҳ (0)