Тошкент шаҳри Мирзо Улуғбек туманида 6 январь куни навбат талашган мижозлар ўртасида жанжал юзага келди. Бу ҳақда Тергов департаменти хабар қилди.

Маълум қилинишича, шу куни соат 18:00 атрофида Мирзо Улуғбек кўчасида жойлашган умумий овқатланиш масканида Хитой фуқароси С.V. (1983 йилда туғилган) жамиятда юриш-туриш қоидаларини қасддан менсимасдан, ошхонада оила аъзолари билан овқатланиб турган К.Д. (1986 йилда туғилган) билан жанжаллашган. Ўзаро тортишув оқибатида эркак унинг бош қисмига ўнг қўлини мушт қилган ҳолда бир марта зарба бериб, тан жароҳати етказган.

Фото: Тергов департаменти

Тергов департаменти илова қилган суратда жабрланувчининг жинси аёл эканини билиш мумкин.

Суд тиббий экспертиза хулосасида К.Д.да енгил турдаги тан жароҳатлари мавжудлиги кўрсатилган.

Тергов жараёнида аниқланишича, С.V. ҳамда К.Д. мазкур умумий овқатланиш масканида навбатларини бўлиша олмай қолгани аниқланган. Шу вақтда С.V. фуқаро К.Д.ни инглиз тилида ҳақорат қилгани сабабли жанжал кўтарилиб, тортишув натижасида С.V. уни уриб, тан жароҳат етказган.

Ҳолат юзасидан С.V.га нисбатан Жиноят кодексининг 277-моддаси 1-қисми (безорилик) билан жиноят иш қўзғатилган. Ҳозирда тергов давом этмоқда.

Бу турдаги жиноятлар учун Жиноят кодексининг нормаларига кўра, базавий ҳисоблаш миқдорининг 50 бараваридан 100 бараваригача миқдорда жарима ёки 300 соатгача мажбурий жамоат ишлари ёхуд 3 йилгача ахлоқ тузатиш ишлари жазоси тайинланади.