АҚШда коронавирусга чалинган тиббиёт ходимларининг ишлашига рухсат берилди

АҚШда коронавирус аниқланган, бироқ унинг енгил шаклини бошдан ўтказаётган тиббиёт ходимларига профессионал мажбуриятларини бажаришга рухсат берилди, деб хабар беради Associated Press.

Таъкидланишича, ҳукумат бу каби қарорни мамлакат шифохоналарига тиббиёт ходимлари етишмаётгани ва «омикрон» штамми сабаб янги касалланиш ҳолатлари ортаётгани боис қабул қилган.

Ўтган дам олиш кунлари Калифорния штати соғлиқни сақлаш органлари коронавирусга топширган тести ижобий чиққан, бироқ енгил кечаётган шифохона ходимларининг ишлашига рухсат берган. Род-Айленд ва Аризонадаги айрим касалхоналар, шунингдек, ходимларига касаллик белгилари борлигига қарамай, ишда қолиши мумкинлигини маълум қилган.

«Омикрон» штамми АҚШда коронавирус билан касалланиш ҳолатларининг ортишига олиб келди, хусусан, ўртача бир кунда 700 минг кишида COVID-19 тасдиқланмоқда — бу бир йилда ўрнатилган антирекорддан кўпдир.

Мамлакатдаги кўплаб касалхоналар нафақат касаллар билан тўлиб тошган, балки коронавирусга чалинган касал ишчиларнинг кўплиги сабабли уларнинг ишларида етарли чекловлар мавжуд.

Reuters агентлигининг маълумотларига кўра, АҚШда 10 январь куни 1,35 миллион кишида коронавирус инфекцияси тасдиқланган. Бу бутун дунёда пандемия бошланганидан буён қайд этилган суткалик энг юқори кўрсаткич. Бундан олдинги рекорд 3-явар куни қайд этилганди — ўшанда АҚШда бир суткада 1,03 миллион кишида COVID-19 аниқланган.

Шунингдек, АҚШда коронавирус билан шифохонага ётқизилган беморлар сони ҳам пандемия бошланганидан буён максимал кўрсаткичга чиққан. Маълум қилинишича, ўтган 24 соат ичида 136 мингдан ортиқ одам шифохонага ётқизилган.

Коронавирус билан касалланиш ҳолатларининг ортиши қатор ҳудудларда ходимлар, ўқитувчи ва мактаб автобуслари ҳайдовчилари етишмовчилигини келтириб чиқариб, мактаблар фаолиятини тўхтатмоқда. Нью-Йоркда ходимлар орасида касаллар сони ортгани боис учта метро линиясининг иши тўхтатилган.

Аввалроқ Кипрда дельта ва «омикрон» штаммларининг гибриди аниқлангани, Буюк Британия ва Францияда коронавирус билан кунлик касалланиш рекордлари янгилангани тўғрисида хабар берилганди.