Ижтимоий тармоқларда Наманган шаҳри ҳудудида минглаб одамлар тунда йўлни тўсиб ҳаракатланаётгани тасвирланган видео тарқалди. Наманган вилояти ИИБ ахборот хизматининг маълум қилишича, видеодаги ҳолат 31 декабрь куни шаҳардаги истироҳат боғи яқинида содир бўлган.

Кадр: Telegram

Маълум қилинишича, «Янги йил арчаси» байрам тадбирлари муносабати билан Наманган шаҳрининг «Афсоналар водийси» истироҳат боғига 31 декабрь куни вилоятнинг марказий арчаси ўрнатилган бўлиб, унга вилоятнинг барча туманларидан мингга яқин фуқаролар ташриф буюриб, атрофида тўпланган.

«Афсоналар водийси» истироҳат боғига  жамоат тартибини сақлаш ва фуқаролар хавфсизлигини таъминлаш мақсадида вилоят ИИБ ЖҚБ, ТЕҚКБ, ҲПБ, ППХ ва ЖЦБ, Кинология хизмати, Наманган шаҳар ИИО ФМБ 1-сонли ИИБ хамда Миллий гвардиядан жами 253 нафар ходим хизматга жалб қилинган.

«Жамоат тартибини сақлашга жалб қилинган ҳуқуқни муҳофаза қилувчи органлар ходимлари томонидан фуқаролар тарқатиб юборилаётган ҳолат интернет тармоқларида намойиш қилинган», — дейилади муносабатда.

Таъкидланишича, 31 декабрь куни Наманган вилояти ҳудудида норозилик чиқишлари ва намойишлар ҳамда кўнгилсиз ҳолатлар содир этилмаган.