UzAuto Motors’нинг Озарбайжоннинг Ҳажигабул шаҳридаги заводида 28 декабрдан Chevrolet Damas, Labо, Lacetti, Tracker ва Malibu автомобилларини йиғиш йўлга қўйилди. Бу ҳақда компания ахборот хизмати хабар қилди.
Қайд этилишича, ишлаб чиқариш «Азермаш CП» МЧЖ ҚК заводининг ишлаб чиқариш қувватларида йўлга қўйилган бўлиб, бу ерда 2021 йилнинг сентябрь ойидан буён Chevrolet Nexia ва Cobalt автомобиллари ишлаб чиқарилмоқда. Барча маҳсулотлар General Motors томонидан ўрнатилган жаҳон стандартларига мувофиқ ишлаб чиқарилади.
Ушбу йўналишда кейинги қадам Озарбайжондаги Chevrolet автомобиллари портфолиосини янги перспектив автомобиль моделлари билан тўлдириш режалаштирилган. Шунингдек, келгуси йилларда ишлаб чиқаришни босқичма-босқич оширилади. 2022 йил охирига келиб, йилига камида 5 мингта автомобиль ишлаб чиқариш қувватига эришиш кўзда тутилган.
Эслатиб ўтамиз, Боку шаҳри яқинида жойлашган Ҳажигабул саноат квартали таркибига кирувчи «Азермаш CП – Автосаноат Инвест» МЧЖ (Ўзбекистон) ва «СТА Инсаат» МЧЖ (Озарбайжон) томонидан ташкил этилган қўшма компания ҳисобланади.
Лойиҳа томонлар ўртасида 2021 йил 21 июлда имзоланган келишув туфайли амалга оширилган. Муносабатларнинг янги босқичи 2019 йил октябрь ойида Шавкат Мирзиёевнинг Бакудаги расмий ташрифи вақтида Туркий кенгашнинг саммити доирасида эълон қилинган. Ҳажигабул шаҳрида 17 сентябрь куни UzAuto Motors ва SamAvto заводи ишлаб чиқариш линиясининг тантанали очилиш маросими бўлиб ўтган.
Аввалроқ Ўзбекистон 11 ойда қайси давлатларга энг кўп автомобиль экспорт қилгани маълум бўлганди. Унга кўра, Озарбайжон 253 та автомобиль билан 4-ўринни банд этган.
Изоҳ (0)