29 декабрь куни Термиз шаҳри «Мангузар» маҳалласида уй-жойга муҳтож фуқаролар учун бунёд этилган янги уйлар ўз эгаларига топширилди. Бу ҳақда Сурхондарё вилояти ҳокимлиги матбуот хизмати хабар берди.
Маълум қилинишича, тантанали маросимда вилоят ҳокими Тўра Боболов иштирок этиб, хонадон эгаларини янги уй-жойлар билан табриклаган ва республикадаги энг арзон уйлар Сурхондарёда бўлиши кераклигини таъкидлаган.
«Президентимиз ташаббуси билан бошланган хайрли иш бугун яна 100 та оила, ногиронлиги бўлган хотин-қизларнинг қалбида эртанги кунига умид ва ишончини мустаҳкамлади... Ушбу оилалар давлат томонидан қўллаб-қувватланиб, уй-жойлари учун бошланғич тўлови тўлаб берилди. Энг асосийси, бу уй-жойлар ҳам мустаҳкам, яшаш учун тайёр ҳолда нисбатан арзон нархда сизларга топширилмоқда. Яъни 1 квадрат метр учун 3 миллион 200 минг сўм. Бундан кейин шаҳар ва туманларда шундай уйлар қурилади», — дейди Тўра Боболов.
Вилоят раҳбарининг қайд этишича, бунинг учун вилоятда барча имконият мавжуд. Қурилиш материалларнинг деярли барчаси Сурхондарёнинг ўзида ишлаб чиқарилади. «Қум-тош, цемент, ғишт, бетон плиталар бошқа ҳудудлар каби узоқдан олиб келинмайди. Хўш, нима учун қиммат бўлиши керак?! Энди қуриладиган янги уйлар халқимизга маъқул келадиган нархларда қурилиши керак. Бу асосий талаблардан бири бўлади», — деган у.
Тўра Боболов кенг жамоатчилик вакиллари иштирокида уй-жойга муҳтож 100 нафар фуқарога янги уйларнинг калитларини тантанали топширган.
Аввалроқ Қашқадарёда Янги йил байрами арафасида 180 та оилага янги хонадон калитлари топширилгани, Ўзбекистон ҳудудларида «Янги Ўзбекистон» массивлари қурилиши учун 992 гектар ер майдони танлаб олингани, республикада тўрт йил ичида 6 мингдан ортиқ кўп квартирали уй-жойлар мукаммал таъмирланиши тўғрисида хабар берилганди.
Изоҳ (0)