Facebook’даги «Самарқандни қутқарайлик» гуруҳи фаоли тасдиқланмаган хабарни тарқатгани учун ҳибсга олинди

Самарқандлик жамоат фаоли Руслан Хаирнуров тасдиқланмаган маълумотни тарқатгани учун ҳибсга олинди, дея хабар бермоқда «Gazeta.uz» нашри «Самаркандский вестник» бош муҳаррири ўринбосари Анастасия Павленкога таяниб.

Журналистнинг нашрга маълум қилишича, гап «Самаркандский вестник» гуруҳидаги постни «Ўзбекистон овози» гуруҳига улашилгани ҳақида кетмоқда. Постда «Самарқанд вилояти соғлиқни сақлаш бошқармаси бошлиғи Давронбек Жуманиёзов бош шифокор лавозими учун 80 минг доллар олгани сабаб жиноий иш қўзғатилган», деб ёзилган эди.

19 декабрь куни вилоят соғлиқни сақлаш бошқармаси матбуот хизмати ижтимоий тармоқларда «Самарқанд вилояти соғлиқни сақлаш бошқармасини омма олдида обрўсизлантириш, соҳа раҳбариятига ҳақоратомуз фикрларни тарқатиш мақсадида асоссиз, ноўрин ва туҳмат маълумотлар тарқатилганини» маълум қилди.

«Шу сабабли биз маълумотлар муаллифларидан тарқатилган хабар ва мулоҳазаларни асослаб беришларини сўраймиз. Акс ҳолда, Самарқанд вилояти соғлиқни сақлаш бошқармаси ходимларини ёлғон маълумотлар тарқатгани ва қасддан обрўсизлантиргани учун тегишли ҳуқуқни муҳофаза қилувчи органларга мурожаат қилишимиз кераклигини маълум қиламиз», — дейилади хабарда.

Анастасия Павленконинг сўзларига кўра, пост бир кундан камроқ вақтдан сўнг ўчириб ташланган.

Унинг фикрича, Руслан Хаирнуров ижтимоий фаоллиги учун ҳибсга олинган.

«Самарқандда фуқаролик жамиятини истамасликларини англаб етдик. Самарқандда кераксиз ва ноқулай саволларни сўрамайдиган, думларини содиқлик билан ликиллатиб, раҳбарларнинг қонунларни қўпол тарзда бузишига, халқнинг пули, мулки ва эркинлигини ўғирлашига йўл қўядиган, шу билан бирга, бу ноқонуний хатти-ҳаракатларни оғизини кўпиртириб мақтайдиган вилоят ҳокимиятига содиқ одамлар керак», – деб ёзди у Facebook’да 28 декабрь куни.

Журналистнинг айтишича, «Самарқандни асраймиз» («Сохраним Самарканд») гуруҳининг фаол аъзоларидан бири Руслан Хаирнуров билан биргаликда бир қатор ўта муҳим мавзулар, жумладан, шаҳарсозлик, экология, коммунал хизматлар, қонунчиликни амалга ошириш масалалари бўйича давлат идораларига кўплаб мурожаатлар қилган.

«Аммо, кўряпсизки, Самарқандга бундай фаол фуқаролик позицияси керак эмас, шунинг учун ҳам ҳуқуқ-тартибот идоралари у ёқда турсин прокурорлар ва судьялар қўпол қонун бузилишларига йўл қўймоқда. Руслан Хаирнуров кеча тасдиқланмаган маълумотларни репост қилгани учун ҳибсга олинган. Пост муаллифлари жазоланмади, репост қилганлар эса таъқибга учради. Бу амалдаги қонунчиликка зид!» – деди Анастасия Павленко.

«Эзгулик» инсон ҳуқуқларини ҳимоя қилиш жамияти 17 декабрь куни Руслан Хаирнуров ва бошқа шахсларга нисбатан Жиноят кодексининг 139-моддаси (туҳмат) 3-қисми бўйича жиноят иши қўзғатилгани ҳақида хабар берди.

Ҳуқуқни ҳимоя қилиш ташкилотининг хабар беришича, Самарқанд шаҳар ички ишлар бошқармаси тезкор ходимлари фаолни жиноят ишлари бўйича шаҳар суди судьяси Илҳом Эргашевнинг 24 декабрь куни соат 22:40 да сиртдан, айбланувчининг иштирокисиз бўлган судда қабул қилган ажримига асосан ҳибсга олган.

«Суд ҳужжатига кўра, Самарқанд шаҳар прокурори Дилмурод Саидқулов терговдан бўйин товлагани учун Хаирнуров Руслан Равилевични ҳибсга олиш тўғрисида илтимоснома берган, қидирувга берилган, бироқ у терговга келмаган. Шу билан бирга, прокурорнинг ўзи қайд этишича, Хаирнуровнинг содир этган (тергов маълумотларига кўра) жиноий ҳаракати ижтимоий хавфлилик даражаси паст бўлган қилмишга тегишли», – дейилади хабарда.

«Эзгулик»да эса фаолнинг уйида яқинлари билан доимий яшаб келгани, мобил телефони доим ёниқ бўлганини айтишди.

Ташкилот, шунингдек, Жиноят кодексининг 139-моддаси 3-қисмида БҲМнинг 300 дан 500 бараваригача жарима ёки 360 соатдан 400 соатгача мажбурий жамоат ишлари ёки 1 йилдан 3 йилгача озодликни чеклаш тарзидаги жазо назарда тутилганига эътибор қаратди. «Эзгулик» фаолни ҳибсдан озод қилишни талаб қилди.

«Бўлган воқеа Руслан Хаирнуров унга нисбатан қамоқ жазоси назарда тутилмаган қилмиши учун олдиндан озодликдан маҳрум этилганини англатади», — дейилади хабарда.

Анастасия Павленконинг «Gazeta.uz»га аниқлик киритишича, давлат адвокати Руслан Хаирнуров аввалига эҳтиёт чорасини ўзгартириш бўйича апелляция беришни истамаган, лекин охир-оқибат ҳуқуқ ҳимоячилари аралашувидан кейин буни амалга оширган. Мурожаатни кўриб чиқиш бўйича биринчи суд мажлиси «Руслан Хаирнуров суд залига олиб келинмагани» сабаб ўтказилмади. Учрашув 31 декабрга кўчирилди.

Туҳмат қилиш эҳтимоли бўйича жиноий иш Янги йилдан кейин кўриб чиқилиши режалаштирилган. «Gazeta.uz»нинг маълум қилишича, нашр ҳолат юзасидан Ички ишлар вазирлигидан изоҳ ололмаган.