Наманганда Матбуот уйи мукаммал таъмирланади, маҳаллий телерадиокомпания эса мегастудияга эга бўлади

Наманган вилояти ҳокими Шавкат Абдураззоқов маҳаллий ОАВга тегишли биноларда бўлиб, уларнинг бугунги ҳолати билан танишди. Бу ҳақда «Дарё» мухбири Азизбек Абдувалиев хабар бермоқда.

Вилоят телерадиокомпанияси биноси президентнинг Наманганга ташрифидан сўнг инвестиция дастурига киритилган ва капитал таъмирлаш ишлари бошланган эди. Биринчи босқич учун 9,3 миллиард сўмдан ортиқ маблағ ажратилди.

Бу маблағ эвазига радио уйи, телемарказнинг бир қисми таъмирланиб, 450 квадрат метр майдонга эга янги мегастудия барпо этилмоқда.

Иккинчи босқичда телемарказ таъмирини якунига етказиш ҳамда энг замонавий қурилма ва жиҳозлар келтирилиши кўзда тутилган.

Шавкат Абдураззоқов телерадиокомпаниядаги қурилиш ишларини жадаллаштириш ва бинога туташ ҳудудни ободонлаштириш юзасидан ўз тавсияларини берди.

Наманган шаҳри марказида жойлашган Матбуот уйи қурилганига 40 йилдан ошди. Бу ерда вилоят ҳокимлигининг «Наманган ҳақиқати» ва «Наманганская правда» газеталари, шунингдек, яна ўнлаб нашрлар таҳририятлари жойлашган. Бино ўтган вақт мобайнида бирор маротаба мукаммал таъмирланмаган эди.

Шавкат Абдураззоқов Матбуот уйига ҳам борди ва у ердаги аҳвол билан танишди.

Ҳоким Матбуот уйида 2022 йилнинг январь ойидан капитал таъмирлаш ишларининг бошланишини айтди. Келгуси йили замонавий таъмирланган ва барча шароитларга эга бино журналистлар учун фойдаланишга топширилади.