Индонезиянинг Ява оролида Семеру вулқонининг отилиши туфайли 13 киши ҳалок бўлди. Бу ҳақда Лумажанг округи ҳукумати раҳбари Инда Амперватига таяниб, Detik нашри хабар берди.
«Бугун яна 12 кишининг жасади топилди», — деди расмий. Бир кун олдин маҳаллий аҳолидан бирининг ўлими тасдиқланган эди.
Табиий офатларни бошқариш миллий агентлиги (BNPB) расмий вакили Абдул Мухарийнинг сўзларига кўра, ҳозирча ҳалок бўлганлардан фақат икки нафарининг шахси аниқланган. Шу билан бирга, яна 98 киши жумладан, икки ҳомиладор аёл қайноқ лавадан куйган ёки турли даражада жароҳатлар олган. Камида 35 киши касалхонага ётқизилган, 902 киши эвакуация қилинган.
Шунингдек, вулқон Лумажанг ҳудудидаги икки туманни Маланг шаҳри билан боғлайдиган стратегик кўприкни бузиб юборган. Бир қанча уйларга жиддий зарар етган.
Маҳаллий аҳолининг сўзларига кўра, олдиндан огоҳлантириш тизими ишламагани учун кўпчилик эртароқ қочишга улгурмаган.
4 декабрь куни тахминан 15:20 (Тошкент вақти билан 13:20) да Семеру вулқонининг фаоллиги ошган. Семеру — Ява оролидаги энг баланд чўққи, унинг аввалги отилиши жорий йилнинг январь ойида содир бўлган, ўшанда маҳаллий аҳолидан ҳеч ким жабрланмаган.
Индонезияда бундан аввал март ойининг бошида вулқон отилиши юз берганди. Индонезиянинг Суматра оролида Синабунг вулқони уйғонган. Ўндан ортиқ отилишлар қайд этилган. Вулқон кули 5 километр баландликка кўтарилган.
Изоҳ (0)