Бугун,

  • USD 10940.05
  • RUB 182.26
  • EUR 11121.65

Президент Шавкат Мирзиёев раислигида бўлиб ўтаётган видеоселектор йиғилишида давлат раҳбари томонидан 2021 йилнинг 1 декабридан Қишлоқ хўжалиги жамғармаси томонидан мева-сабзавот етиштирувчиларни имтиёзли кредитлаш йўлга қўйилиши маълум қилинди.

Бунда, «кластер – фермер – банк» занжири асосида, маҳсулот ҳажми ва молиялаштириш муддатлари аниқ кўрсатилган уч томонлама шартномалар тузилади.

Кредитлар 12 ойга 6 ой имтиёзли даври билан 14 фоиз ставкада ажратилади. Ҳар бир маҳсулот турига қараб, молиялаштириш схемалари ишлаб чиқилади. Мисол учун, такрорий экин учун июнда, тўқсонбостига сентябрда маблағ ажратилади. Кластерларга томорқалардан тайёр маҳсулот сотиб олишга айланма маблағ учун 12 ойлик «револвер» кредитлар берилади.

«Яъни, кластер қачон зарур бўлса, маблағни шунда олади ва фоизини кредитдан фойдаланган давр учун тўлайди. Бунда, пахта ва ғалладаги каби, кредит гарови учун суғурталаш тизими жорий этилади. Ушбу мақсадлар учун жами 2 триллион сўм алоҳида йўналтирилади. Ҳар бир вилоят ҳокими эшицин, пул тайёр турибди. Энди уни ақл билан олишни ўрганиш керак», – деди Мирзиёев.

Халқаро молия ташкилотлари маблағлари ҳисобидан кичик интенсив боғ, узумзор ва мева-сабзавотчиликни ривожлантириш учун, 14 фоизлик имтиёзли ставкада 100 миллион сўмгача гаровсиз кредит берилади. Бунга, халқаро молия ташкилотларининг 100 миллион доллар маблағи йўналтирилади.

Шунингдек, давлат раҳбари яна бир масала – экспорт шартномаси бўлган мева-сабзавот етиштирувчиларга ҳосилни хавф-хатардан суғурталаш харажатларининг 50 фоизи бюджетдан қоплаб берилишини маълум қилди.

«Кластерлар томонидан чет элдан малакали агроном, энтемолог, лаборатория мутахассиси жалб қилиш харажатларининг 50 фоизигача қисмига субсидия берилади.

Масъуллар икки ҳафтада «кластер – фермер – банк» ўртасидаги уч томонлама шартноманинг намунавий шаклини ишлаб чиқиб, солиқ идораларида электрон рўйхатга олиш тизимини йўлга қўйсин», – дея топшириқ берди Президент.

Қайд этилган имтиёзлар шартномалари рўйхатдан ўтган кластерларга берилиши таъкидланди.

Изоҳ
Асосий янгиликлар