Ўзбекистонда энди талабалар билан тузилган кўчмас мулк ижара шартномаларини ҳам E-ijara интерактив хизматида ҳисобга қўйиш мумкин. Бу ҳақда Давлат солиқ қўмитаси хабар қилди.
Маълум бўлишича, ижарага берувчи «ijara.soliq.uz» сайтига кириб «Ижарага олувчи тўғрисида маълумот» ойнасига ижарага олувчи талабанинг ЖШИРни киритганда талабага оид маълумотлар (Ф.И.О, таълим олаётган ўқув юрти, факультети, таълим шакли ва босқичи, шунингдек, доимий рўйхатга олинган манзили) автоматик шаклланади. «Телефон рақами» қаторига ижарага олувчи талабанинг телефон рақами киритилиб, «Тасдиқлаш кодини юбориш» тугмаси босилади. Талабанинг телефонига SMS орқали келган 5 хонали рақам «Тасдиқлаш коди» қаторига ёзилиб, «Тасдиқлаш» тугмаси босилади. «Тасдиқлаш» тугмасини босишдан аввал ижарага олувчи талаба билан бирга турган бошқа талабаларни ҳам «Қўшиш» тугмаси орқали дастурга киритиш мумкин.
Қайд этилишича, ижара шартномаларини солиқ органида ҳисобга қўйилгани тўғрисидаги гувоҳномада талаба ва у билан бирга турувчи талабалар ҳақида маълумотлар ҳам шаклланади. Талабалар билан тузилган ижара шартномалари ҳисобга қўйилганда ушбу маълумотлар Олий ва ўрта махсус таълим вазирлиги базасида шаклланади. Бу эса ойлик ижара тўловининг бир қисмини қоплаб беришда олий ўқув юртларига қулайлик яратади.
Эслатиб ўтамиз, Шавкат Мирзиёев 2021 йилнинг апрель ойида ижарада яшаётган талабаларга 1 майдан бошлаб ижара тўловининг ярми давлат томонидан қоплаб берилишини айтганди. Кейинчалик ижара тўлови харажатларининг 50 фоизи БҲМнинг бир бараваридан ошмаган тақдирда тўлаб берилиши маълум бўлган. Сентябрь ойида талабаларга ижара тўловининг бир қисмини қоплаб бериш тартиби белгиланган.
Изоҳ (0)