АҚШда гиёҳванд моддаларни меъёрдан ортиқ қабул қилиш оқибатидаги ўлимларнинг йиллик кўрсаткичи рекорд ўрнатди. Бу ҳақда АҚШ Касалликларни назорат қилиш ва олдини олиш марказининг (CDC) дастлабки маълумотларига таяниб, CNN хабар берди.

Фото:Stevepb

CDC маълумотларига кўра, 2020 йилнинг апрелидан 2021 йилнинг апрелигача ҳаддан ортиқ дозадаги наркотикдан ўлим ҳолатлари аввалги йилга нисбатан 28,5 фоизга ўсган, сўнгги беш йил ичида эса деярли икки бараварга кўпайган.

Ўтган йил давомида 100 306 АҚШ аҳолиси ушбу сабаб ортидан вафот этган. Гиёҳванд моддалар истеъмолини ошириб юборишдан ўлим ҳолатларининг энг катта ўсиши Ғарбий Виржиния, Кентукки ва Теннесси штатларида қайд этилган.

Ўлимга олиб келувчи гиёҳванд моддалар — асосан, опиоидлар бўлиб қолмоқда. Синтетик опиоидлар, айниқса, фентанил сўнгги 12 ой ичида меъёрдан ортиқ наркотикдан ўлим ҳолатларининг 64 фоизини келтириб чиқарди.

Мутахассисларнинг фикрича, гиёҳванд моддаларни ҳаддан ортиқ қабул қилиш туфайли вафот этганлар сонининг кўпайиши коронавирус пандемиясининг оқибатлари ҳамда фентанилнинг кенг тарқалиши билан боғлиқ бўлиши мумкин, чунки ушбу моддани халқаро транспорт чекловлари шароитида ҳам ишлаб чиқариш бирмунча осон.