Самарқанд вилояти Жомбой туманида 16 ноябрь куни елим ишлаб чиқариш цехи ёниб кетди. Бу ҳақда Фавқулодда вазиятлар вазирлиги хабар қилди.
Маълум бўлишича, 12:44 да туман Фавқулодда вазиятлар бўлимига «Назар» маҳалласида жойлашган Chinlateks МЧЖ ҳудудидаги клей ишлаб чиқариш цехида ёнғин содир бўлаётгани тўғрисида хабар келиб тушган.
Шунга кўра, 6 та ёнғин-қутқарув экипажи воқеа жойига соат 12:55 да етиб бориб, ёнғин соат 14:50 да қуршаб олинган ва соат 15:51 да бартараф этилган.
Қайд этилишича, ёнғин оқибатида цехнинг тахминан 400 квадрат метр майдонда томи, шифти ва ички қисмида елим маҳсулотлари ёниб зарарланган. Ҳодиса оқибатида жабрланган ва ҳалок бўлганлар йўқ. Ҳозирда ёнғиннинг келиб чиқиш сабаби ва моддий зарар миқдори аниқланмоқда.
Эслатиб ўтамиз, аввалроқ Қаршидаги банк шохобчасида ёнғин юз бергани хабар қилинганди.
Изоҳ (0)