Бугун Транспорт вазирлигида Туризм ва спорт вазирлиги мутасаддилари ҳамда мамлакатимизда фаолият юритаётган тур индустрияси вакиллари иштирокида учрашув бўлиб ўтди. Тадбирда транспорт логистикасини ривожлантириш ҳамда туризм соҳасида транспорт хизматларини кўрсатишдаги мавжуд муаммолар муҳокама этилди.
Транспорт вазирининг логистика ва туризмни ривожлантириш масалалари бўйича маслаҳатчиси Т. Б. Аллаяров раҳбарлигида бўлиб ўтган учрашувда тур индустрияси вакиллари ўз фаолияти давомида юзага келаётган муаммоли масалалар ва уларнинг ечими юзасидан Транспорт вазирлиги тизим ташкилотлари вакиллари билан фикр алмашишди.
Хусусан, транспорт қатновлари ва логистика билан боғлиқ масалалар, маҳаллий ва халқаро йўналишларда бажарилаётган авиақатновлар, авиа ва темир йўл чипталарини сотиб олиш жараёнлари, сайёҳлик автобуслари қатновлари билан боғлиқ жиҳатлар муҳокамалар марказида бўлди.
Учрашувда иштирок этган сайёҳлик компаниялари вакиллари маҳаллий йўналишларда авиақатновлар сонининг оширилгани, чипталарни авиакомпания сайтидан сотиб олганда тақдим этилаётган чегирмалар, «Афросиёб» поездлари қатновларининг кўпайтирилгани ва темир йўл кассаларининг иш фаолияти 24 соат давомида ташкил этилганлигини алоҳида эътироф этишди.
Шунингдек, учрашув давомида бир нечта масалалар, жумладан, транспортнинг барча турлари бўйича батафсил маълумотларни қамраб олган, ўзаро интеграциялашган ягона портални яратиш, айрим йўналишлардаги авиа ва темир йўл қатновлари жадвалини сайёҳларга янада қулай қилиб қайта ишлаб чиқиш, йўл бўйи инфратузилмасини ривожлантириш юзасидан қатор таклифлар илгари сурилди.
Томонлар туризм соҳасидаги логистика хизматларини ривожлантириш йўлида ўзаро манфаатли ҳамкорликни давом эттиришга, шунингдек, долзарб масалаларни муҳокама қилиш учун мунтазам учрашувлар ташкил этишни давом эттиришга келишиб олдилар.
Транспорт вазирлиги матбуот хизмати
Изоҳ (0)