Taniqli yozuvchi Ulug‘bek Hamdam Facebook’dagi sahifasi orqali Toshkent viloyati Nurafshon shahrida Zulfiya Zokirova nomiga haykal majmuasini qurishga 28,4 milliard so‘m ajratilgani to‘g‘risida tarqalgan xabarlar yuzasidan fikr bildirdi.
U “Uyida chaksa uni yo‘q, tom boshida qo‘sh tandir” maqolini misol sifatida keltirib, amaldorlar shundan xulosa chiqarib ish ko‘rsa, O‘zbekiston gulistonga aylanib ketishini yozgan.
Oh, mening dono xalqim! Ko‘pni ko‘rgan donishmandim!!!Toshkent viloyati hokimining farmoyishiga ko‘ra, Nurafshon shahrida Zulfiya Zokirova nomiga haykal majmuasini qurish va atrofini obodonlashtirish ishlari uchun 28,4 milliard so‘m ajratilgani to‘g‘risida xabar berilgandi. Shuningdek, Nurafshon Business City hududida zamonaviy kutubxona binosining qurilishi uchun 6 milliard so‘m mablag‘ ajratilishi ko‘zda tutilgan.Qani endi bu, xudoyim to‘g‘ri yo‘lga solgur ayrim amaldorlarimiz sening maqollaring mag‘zini chaqib, ulardan xulosa chiqarib yashasa-yu, yurtimiz gulistonga aylansa!..
O‘zbekistonda Zulfiya opa qismatini yoritib berguvchi yaxshi bir film ishlandi. Elning e’tibori qaratildi, duolar qilindi. Mamlakatning hozirgi holida bir inson qismatiga shu e’tiborning o‘zi juda katta yaxshilik! Bu ishning yaxshilik ekanini aytdik, mana, yana aytyapmiz.
Tag‘in e’tibor ko‘rsatmoqchi bo‘lsalaring, otangizga boz rahmat, deymiz. Lekin har bir narsaning o‘z o‘rni, yo‘rig‘i, me’yori, usuli bor axir. Odamlarimiz topib aytayotganidek, ana, o‘sha regionga kerakli shifoxonami, maktabmi qurib, opaning nomi bilan atanglar!
“Mening ota-onam ‘Zulfiya shifoxonasi’da davolanib chiqishdi, shifoxonamisan shifoxona, do‘xtirlari zo‘r! Baraka topishsin! ‘Zulfiya’ga boringlar, ‘Zulfiya’ga!”, yoki “Mening o‘g‘lim ‘Zulfiya’da o‘qidi-da, o‘shanchun institutlarga kirib ketdi.
O‘qituvchilariga balli. Siz ham qizingizni “Zulfiya maktabi”ga bering, aylanay!”, deya el-yurt gapirsa, duolar qilsa, qanchalar yaxshi. Duo Zulfiya opa va uning o‘g‘illariga borsa, shifoxona-yu maktabdan kelgan foyda elga tegadi. Yoki yo‘qmi?!.. Yahudiylarning “pul topishdan oldin uni sarflashni o‘rgan!” degan bir maqoli bor.
Biz topgan yoki qarz olgan pulimizni hasham-u to‘yga, haykal-u beton binolarga sarflab, kelajak degan daraxtning ildiziga bolta uryapmiz, ha! 100 yil burun shuni aytib, jadid bobolarimiz kuyib-yonib ketishgandi.
Hozirda xalqimizning asosiy qismi o‘rtachadan ham pastroq, ya’ni uyida chaksa unsiz holda kun ko‘rayotgan bir paytda bitta haykalga xalqning pulidan shuncha mablag‘ (28 milliard so‘m-a!) ajratish tomboshiga qo‘shtandir o‘rnatish deganidir. Xalq uyini, omborini unga to‘ldirib qo‘ying, keyin qo‘shtandir nima bo‘pti, mingtandir quring, yarashadi. Aks holda... aks holda, ko‘pchilik aytayotganidek, “pul yuvish operatsiyasi” degan tamg‘adan qochib qutulib bo‘lmaydi.
Ulug‘bek Hamdam, yozuvchi
Umumiy qiymati 34,4 milliard so‘m bo‘lgan (8-noyabrdagi Markaziy bank kursi bo‘yicha 3,2 million dollar) mablag‘lar viloyat mahalliy budjetining 2021-yil III chorak yakuni bilan shakllangan daromadlar rejasining orttirib bajarilgan qismi hisobidan ajratiladi.
Viloyat hokimligi ushbu rejalashtirilayotgan xarajatlarning asosligi bo‘yicha jamoatchilikdan kelib tushgan savollarga javoban ma’lumot bergan bo‘lib, unda bo‘lajak memorial majmua 2,97 gektar hududda park, o‘yin va piknik maydonlari, amfiteatr, terassali va yopiq turdagi kafelar, favvoralar, tashrif buyuruvchilar uchun qulay o‘rindiqlar va yashil hududlar, piyodalar va velosipedchilar uchun qulay yo‘laklar, bolalar maydonchalarini o‘z ichiga olishi aytilgan.
Xabarda ta’kidlanishicha, memorial majmuani qurish tashabbusini Prezident Shavkat Mirziyoyev 16-oktabr kuni viloyatdagi saylovchilari bilan uchrashuv davomida ko‘plab takliflar qatorida bildirgan.
Viloyat ma’muriyatining ma’lumotlariga ko‘ra, tenderda g‘olib chiqqan qurilish kompaniyasi, ayni vaqtda loyihalash ishlari bilan shug‘ullanmoqda.
“Gazeta.uz”ning hokimlikdan aniqlik kiritib yozishicha, loyihani 2007-yilning aprelida Qarshida ro‘yxatdan o‘tkazilgan Qashqadaryo Maks Servis Qurilish xususiy korxonasi amalga oshiradi. Kompaniyaning yagona ta’sischisi sifatida Mahfirat Shodiyevna Boymatova ko‘rsatilgan, rahbar — Bahodir Shokir o‘g‘li Yo‘ldoshev.
Mablag‘ yordamida 1,1 gektar yer maydonida zamonaviy 3 qavatli kutubxona qurilishi rejalashtirilgan bo‘lib, inshoot funksional zonalar va kompyuter uskunalari bilan jihozlanadi. Internet, axborot resurslari va milliy elektron kutubxonadan foydalanish imkoniyati yaratiladi.
“Davlat rahbari tashabbusi bilan qurilishi rejalashtirilgan ushbu inshootlar viloyat aholisi, yoshlari va mehmonlari uchun nafaqat maroqli hordiq chiqarish, balki ma’naviy-axloqiy qadriyatlarni yuksaltirish yo‘lida ham muhim qadam bo‘ladi”, — deyiladi hokimlik xabarida.
“Hurmatli jurnalist va blogerlarimizdan bu mavzudagi axborotni tarqatishda tafsilotlarga e’tibor qaratishlarini so‘raymiz. Qurilish ishlarining borishi va unga sarflanayotgan mablag‘lar haqida jamoatchilikka qo‘shimcha axborot berib boriladi”, — deya ta’kidlanadi xabarda.
Ma’lumot uchun, Zulfiya Zokirova Ikkinchi Jahon urushida beshta o‘g‘lini yo‘qotgan ona hisoblanadi. Zulfiya Zokirova taqdiri aks etgan “Ilhaq” filmi suratga olingan. Toshkentdagi g‘alaba bog‘ida ilk haykali o‘rnatilgan.
Izoh (0)