Қашқадарё вилояти ҳокими Зоир Мирзаев юрак пороги билан туғилган боланинг даволаниши учун 25 миллион сўм маблағ ажратди. Бу ҳақда «Дарё»га вилоят ҳокимлиги ахборот хизмати раҳбари Аҳрор Содиқов маълум қилди.
Аҳрор Содиқовнинг маълум қилишича, боланинг даволаниши учун йиғилган маблағ онасининг соддалиги сабаб фирибгарлар томонидан ўзлаштирилган. Бундан хабар топган Зоир Мирзаев эса боланинг онаси билан боғланиб, ундан қандай ёрдами тегиши мумкинлигини сўраган ва у 25 миллион сўм маблағга муҳтожлигини билиб, кўмак берган.
«Чироқчилик Нурбек исмли бола 2018 йил юрак пороги билан туғилган, кейинчалик оққон касаллиги билан ҳам оғриган. Онаизорнинг айтишича, ўғли доимий равишда шифокорлар кўригидан ўтиб туриши учун эр-хотин беш ойдан бери Тошкент шаҳрида ижарада яшаб келади. Нурбекнинг отаси кунлик ишга чиқади, онаси эса ҳар дақиқада боланинг олдида бўлиши керак. Бу ҳақда хабар топган вилоят раҳбари оилага кўмак берди», — дейди ҳокимнинг матбуот котиби.
Аввалроқ Қашқадарё ҳокими 6 нафар етим болага оналик қилаётган косонлик аёлга 30 миллион сўм моддий ёрдам кўрсатилишини маълум қилганди.
Изоҳ (0)