Дунёда коронавирусга чалинганлар сони 250 миллиондан ошди

Американинг Жонс Ҳопкинс университети маълумотларига кўра, дунёда коронавирусга чалинганлар сони 250 миллиондан ошди.

8 ноябрь ҳолатига кўра, пандемия бошидан буён бутун дунёда 250 005 427 кишида COVID-19 қайд этилган.

Касалланганлар сонининг кўплиги бўйича доимгидек АҚШ етакчилик қилмоқда — 46 488 417 киши. Ундан кейинги ўринда Ҳиндистон (34,3 миллион), Бразилия (21,8 миллион), Буюк Британия (9,3 миллион) ва Россия (8,6 миллион) турибди.

Дунё бўйлаб коронавирус оқибатида вафот этганлар сони эса 5 051 993 кишини ташкил этмоқда. COVID-ўлимлар бўйича ҳам АҚШ энг юқори ўринда, мамлакатда пандемия бошидан бери 754 431 киши инфекция қурбони бўлган.

Шу билан бирга, дунё аҳолисини коронавирусга қарши эмлаш учун 7,2 миллиарддан ортиқ дозада вакцина қўлланилган.

Ўзбекистон Соғлиқни сақлаш вазирлиги маълумотларига кўра, 2021 йил 7 ноябрь ҳолати бўйича Ўзбекистонда коронавирус инфекцияси қайд этилганлар сони 188169 (+245) нафарни ташкил этмоқда. Ўтган суткада 2 нафар бемор вафот этиб, вирус қурбонлари сони 1340 нафарга етган. Ўз навбатида касалликдан соғайганлар сони жами 184242 (+273) кишига етиб, мамлакатда соғайиш кўрсаткичи 98 фоизни ташкил қилмоқда.