«Дунё сўрамаймиз, бизга кераги — озгина эътибор». Элмира Раҳимжонова «Турон» ҳарбий театри актёрлари таъмирталаб бинода ва кам ойликка ишлаётгани ҳақида (видео)

«Чархпалак» сериалидаги лўли Марям роли билан томошабинларга яхши таниш бўлган актриса Элмира Раҳимжонова «Дарё»га интервью берди. У суҳбат давомида ўзи фаолият юритаётган «Турон» ҳарбий театр-студиясидаги ноқулайликлар, маошининг камлиги ва у ерга боғланиб қолишининг сири нимада эканлиги ҳақида гапирди.

— «Турон» театр-студияси узоқ йиллик тарихга эга. Билишимча, Ҳамза Умаров, Римма Аҳмедова, Светлана Норбоева каби устоз санъаткорлар кинодан бўш вақтларида бу театрда ҳам фаолият юритишган экан. Бу анъанани Отабек Мусаев давом эттириб, эски «Киночилар уйи» биносида  «Турон» театр-студиясининг фаолиятини йўлга қўйган.  Театр фаолиятини бошлаган пайтда номидан бўлак ҳеч нарсаси йўқ эди.Ўша йили отам вафот этгани учун тушкунликка тушиб, қишлоққа қайтиб кетгандим. Бир куни актёр Фарҳод Худойбердиев қўнғироқ қилиб, Киночилар театр студияси ташкил этилганини ва Тўмарис ролини менга ишонишаётгани ҳақида айтди. Хуллас, Тошкентга келиб, «Турон» театр-студияси билан танишдим ва ипсиз боғландим.«Киночилар уйи» биноси бузилганидан сўнг бизни «Кинохроника»га кўчиришди. Аммо кўп ўтмай, у ерда ҳам қололмаслигимизни айтишди. Ҳамма муаммолар ана шундан кейин бошланди. Ким бизга кўмак бераркин, деб дуч келган эшикни тақиллатдик. Биз икки йиллик меҳнатимиз ва яратилган спеактлларимизга ачиндик, холос. Мудофаа вазирлиги кўмак берди, аммо жой, бу ердаги шароит ва ойлик маош масаласидаги  муаммоларимиз ҳалигача ўз ечимини топгани йўқ.Хоналар ниҳоятда совуқ, бино таъмирталаб аҳволда... Унинг чеккароқда жойлашгани ҳам томошабинларга ноқулайлик туғдиради. Кўпчилик таниш-билишлар бизни телба деб ўйлашса керак. Чунки «Иқтисодий жиҳатдан қийналиб, ноқулай шароитда ишлаб зарилми?» деб танбеҳ берганлар кўп бўлди. Чунки бошқа ижодкорлар 1 226 000 сўмга ёки 1 446 000 сўмга бу шароитда ишламайди.Театрда Карим Мирходиев, Фарҳод Ҳақбердиев, Феруза Собитова, Жамила Ғофурова, Эркин Бозоров каби кўплаб таниқли киноижодкорлар фаолият юритади. Менимча, уларнинг фаолияти қадрланиши ва ижод қилиши учун қулайлик яратилиши керак.

Режиссёр Сайфиддин Мелиев спектакль либослари, саҳна безаклари ва реквизитлари учун ўзи маблағ сарфлайди, ҳатто бу ишларни бажарувчи ходимлар йўқлиги боис кийимларни ювиш, дазмоллаш ва тозаликни ҳам актёрлар жамоаси ҳашар йўли билан амалга оширади.

Биз ҳеч кимдан нолимоқчи эмасмиз. Балки Мудофаа вазирлигига тўғри мурожаат қилолмаётгандирмиз ёки театр уларнинг эсидан чиқиб кетгандир. Бизга кўп маблағ керак эмас. Озгина қўллаб-қувватлашса, театр ўз йўли ва томошабинини топишига ишонаман. Балки моддий томондан ўзини молиялаштиришни ҳам уддалай олар, — дейди  «Турон» ҳарбий театр-студияси актрисаси Элмира Раҳимжонова.