Аёл фарзанд кутаётган вақтда сочини бўяши мумкинми? Одатдаги гўзаллик тартиб-қоидаларидан воз кечишни истамайдиган оналар учун барча саволларга тиббиёт мутахассиси шифокор Кристин Дин жавоб беради.
Сочни бўяш ҳали туғилмаган бола учун хавфлими?
«Тадқиқотлар олиб борилмаганлиги сабабли баъзи экспертлар кимёвий моддаларни ўз ичига олган барча гўзаллик муолажаларини чақалоқ туғилгандан кейин қайта режалаштиришни тавсия қилмоқда, – дейди доктор Дин. – Жуда чекланган миқдордаги доимий ва ўртача тезкор ранг берувчи моддалар терига кириб бормаса-да, бу моддалар хавфсизлиги ҳақида маълумотлар ҳозирча мавжуд эмас».
Қандай хавфли томони бор?
«Ҳомила учун ўзига хос хавфлар ҳақида маълумот йўқ, аммо ҳайвонларда ўтказилган тадқиқотлар туғма нуқсонларнинг ривожланиш эҳтимолини тасдиқлади, – дейди доктор Дин. –Аммо тажриба давомида аёллар сочларини бўяш пайтида қабул қиладиган моддалардан сезиларли даражада фарқ қиладиган моддалар дозалари ишлатилган, шунинг учун бу маълумотларни ҳақиқий вазият билан солиштириш қийин».
Мутахассиснинг таъкидлашича, ҳомиладорлик пайтида оналари сочларини бўяган болаларда саратон касали билан ўзаро боғлиқликни ўрганган бир нечта тадқиқотлар ҳам ўтказилган.
Биринчи триместрдан кейин сочни бўяш хавфсизми?
Ҳар бир она ҳомиладорликнинг энг муҳим босқичи биринчи триместр эканлигини билади. Лекин биринчи 12 ҳафтадан кейин бўёқлар салбий таъсир кўрсатмаслиги мумкинми? «Биз ҳар қандай триместрда ҳам соч бўяшнинг хавфсизлигини қўллаб-қувватлаш учун ҳали ишончли маълумотларни олмадик», — деб тушунтиради доктор Дин.
Ҳомиладорлик даврида соч бўёғини бош терисига суртмасдан бўяш мумкинми?
Доктор Диннинг фикрича, бу усул қисман тўғри – лекин фақат назарий жиҳатдан. Агар бўёқлар бош терисига тегмаса, уларнинг танага кириб бориши ва ҳомилага таъсир қилиш хавфи деярли нолга тенг.
Унинг сўзларига кўра, тадқиқотлар ҳомиладорлик даврида қаттиқ кимёвий моддалар билан ишлайдиган аёллар, масалан, сартарошларда ҳомилада туғма нуқсонлар хавфи бошқа касбий соҳалардаги аёллар билан бир хил эканлигини тасдиқлайди.
Хўш, қандай йўл тутиш керак?
«Бу саволга аниқ жавобим йўқ, – деб тушунтиради доктор Дин. – Баъзи тадқиқотлар шуни кўрсатадики, ҳомиладорлик пайтида соч бўёқларидан чекланган ҳолда фойдаланиш хавфсиз бўлиши мумкин, аммо чақалоқ учун мумкин бўлган хавф ҳақида далиллар мавжуд».
Унинг шахсий хулосасига кўра, ҳомиладор аёллар боланинг ҳаёти ва соғлиғини хавф остига қўймаслиги керак, шунингдек, соч бўяшни бола туғилгандан кейинги даврга кечиктириш яхшироқдир.
Изоҳ (0)