Uzbekistan Airports таркибида 1 ноябрдан Uzbekistan Airports Handling шўъба ҳэндлинг компанияси фаолият бошлайди. Бу ҳақда компания матбуот хизмати хабар берди.
Қайд этилишича, янги корхона йўловчиларни самолётга рўйхатдан ўтказиш, етказиб бериш ва қўндириш, юкни қайта ишлаш ва етказиб бериш, самолётга ерусти хизмат кўрсатиш, самолётга озиқ-овқат юклаш, шунингдек, аэровокзал комплексининг хизматлари: она ва бола хонаси, тиббий марказ ва маълумотнома хизматларини тақдим этади.
«Йўловчилар оқимининг ҳозирги ўсиш суръати тиғиз вақтларда тирбандликларга бардош бера оладиган, йўловчилар ва ҳаво кемаларига хизмат кўрсатиш билан боғлиқ барча хизматлар ишини оптималлаштириш, шу билан бирга ҳаво кемаларининг сифатини ошириш ва айланиш вақтини қисқартириш имконини берадиган тузилмани шакллантиришни тақозо этмоқда.
Биз буларнинг барчасига авиакомпаниялар, йўловчилар ва самолётлар аэропортларимизга қўнган пайтдан бошлаб ҳавога кўтарилгунга қадар хизмат кўрсатишнинг бутун циклини ўз ичига олган эксклюзив компания ташкил этиш орқали эришмоқчимиз», — деди Uzbekistan Airports бошқаруви раиси Раъно Жўраева.
Бошқарув компанияси хизмат кўрсатишнинг янги ёндашувини ишлаб чиқди. Унга кўра, илгари авиакомпаниялар комплекс хизматларни сотиб олишга мажбур бўлган бўлса, эндиликда улар ўзлари учун зарур хизматлар пакетини шакллантиришлари мумкин. Бу эса авиакомпанияларга кераксиз хизматлар учун ортиқча тўлов қилмаслик имконини беради.
Бундан ташқари, ресурслардан фойдаланиш жараёни ҳам оптималлаштирилди. Эндиликда рейсга хизмат кўрсатиш вақтида биронта ҳам хизматчи бўш турмайди, тизим ягона механизм сифатида ишлайди ва ким нима учун масъул эканини ҳамма аниқ билади. Ушбу оптималлаштириш жалб қилинган ресурслар миқдорининг камайишига ва ходимларнинг даромадлари ошишига олиб келиши айтилмоқда.
Бундан аввал Uzbekistan Airports хориж авиакомпаниялари учун тарифларини пасайтириши ҳамда Uzbekistan Airports мамлакат аэропортлари учун кадрлар тайёрлаш кафедрасини ташкил этиши ҳақида хабар берилганди.
Изоҳ (0)