Қашқадарё вилоятида 2020—2021 йилларда коррупцияга йўл қўлган 274 нафар мансабдор маъмурий, 217 нафар мансабдор эса жиноий жавобгарликка тортилгани маълум бўлди. Бу ҳақда вилоят прокурори Эркабой Тожиев коррупцияга қарши ўтказилган мажлисда айтиб ўтди, дея хабар берди «Дарё» мухбири.

Қайд этилишича, 26 октябрь куни вилоят ҳокимлигида ҳоким Зоир Мирзаев, Олий Мажлис Сенатининг суд-ҳуқуқ масалалари қўмитаси раиси Наримон Умаров ҳамда оммавий ахборот воситалари иштирокида йиғилиш бўлиб ўтган.

Йиғилишда сўз олган вилоят прокурори Эркабой Тожиев вилоятда 2020 йил ва 2021 йилнинг ўтган даври мобайнида 273 нафар шахс томонидан 209 та коррупцион ҳолатга йўл қўйилганини маълум қилган.

«Ўтган икки йилда 111 та бюджет ташкилотида 87 миллиард сўм бюджет маблағлари талон-торож қилингани аниқланди. Ўрганиш натижаларига кўра, 274 нафар мансабдор маъмурий, 217 нафар мансабдор эса жиноий жавобгарликка тортилди», — дейди Эркабой Тожиев.

Вилоят прокурорининг маълумот беришича, жиноят содир этган мансабдорларнинг 99 нафари халқ таълими тизимида фаолият юритган бўлса, 49 нафари тижорат банкларида, қолганлари эса мактабгача таълим, соғлиқни сақлаш, маҳалла ва оилани қўллаб-қувватлаш соҳасида иш олиб борган мансабдорлар экани маълум бўлган.

«41 та жиноят иши бўйича 99 нафар халқ таълими тизими мансабдори коррупцияга йўл қўйгани учун жазоланган», — дейди прокурор Эркабой Тожиев.

Эркабой Тожиевнинг қўшимча қилишича, вилоятда нафақат халқ таълими тизимида, балки олий таълим тизими, хусусан, Қарши муҳандислик иқтисодиёт институтида иш ҳақи ва унга тенглаштирилган бюджет маблағларини талон-торож қилиш ҳолати аниқланган.

«Қарши муҳандислик иқтисодиёт институти масъуллари 2016—2020 йилларда 22 миллиард сўм маблағни ўзлаштирган. Энг ёмони бу ҳолат прокуратура ходимлари аралашмагунга қадар ошкор этилмаган. Ваҳоланки, 2016—2020 йилларда муассасада ички аудит назорати ҳам бўлган. Демак, бу ички аудитда тизимли иш йўқ деган хулосага келинишига сабаб бўлади», — дейди вилоят прокурори.

Бундан аввал Ўзбекистонда 190 та норматив-ҳуқуқий ҳужжат коррупцияга қарши экспертизадан ўтказилиши, олий ва ўрта махсус таълими тизимида 9 ойда қарийб 14 миллиард сўмлик молиявий камчиликларга йўл қўйган 21 нафар ходим ишдан олингани ҳамда Ўзбекистондаги боғчаларда 9 ойда 6,6 миллиард сўмлик иш ҳақи ва товарлар ўзлаштириб юборилгани ҳақида хабар берилганди.