Ташқи ишлар вазири Аблулазиз Комилов Ўзбекистон ва Россия ўртасидаги муносабатлар ҳозирда ривожланишнинг энг юқори чўққисида эканлигини таъкидлади. Бу ҳақда вазир Россия ОАВлари учун матбуот анжуманида маълум қилди, дея хабар берди «РИА Новости».
«Ҳозирда Ўзбекистон ва Россия ўртасидаги муносабатлар ўз ривожланишининг энг юқори чўққисида. 30 йил давомида бизда бундай кенг кўламли ўзаро муносабатлар ва икки томонлама ҳамкорликнинг бундай кенг қамровли дастури бўлмаган», — деди Абдулазиз Комилов.
Вазирнинг таъкидлашича, бу амалда барча соҳаларни — сиёсат, иқтисодиёт, маданият, ижтимоий соҳалар, хавфсизлик ва халқаро майдонда ўзаро алоқаларни ўз ичига олади. «Муносабатлар, иттифоқдошлик ва стратегик шериклик, улар ҳақиқатан ҳам шундай жиддий мазмунда тўпланиб боради. Аммо, шу билан бирга, ҳали фойдаланилмаган имкониятлар кўп. Бу биз ҳали олдинга ҳаракатланишимиз учун имкон борлигини англатади, муносабатларимизни мустаҳкамлаймиз. Бу ёқимли», — дея қўшимча қилди Комилов.
Комиловнинг сўзларига кўра, Ўзбекистон Президентининг ноябрь ойида Россияга режалаштирилган ташрифи учун жуда катта ҳужжатлар тўплами тайёрланган. «Айниқса иқтисодий, гуманитар характерга эга (ҳужжатлар) ва минтақалараро форумни ўтказиш режалаштирилган. Ҳозирда пандемия ҳолатини инобатга олган ҳолда, кўплаб тадбирлар видеоконференцлоқа кўринишида бўлади. Лекин шунга қарамай, биз қўйилган вазифаларни ҳал қилишга ҳаракат қиламиз», — деди Абдулазиз Комилов.
Унинг сўзларига кўра, савдо соҳасида ҳам катта ҳужжатлар тўпламини имзолаш режалаштирилган. «Бугунги кунда Россия билан савдо алоқалари анча жадал ривожланмоқда, ўзаро савдо 5 миллиард доллардан ошган ва бундан кейин ҳам ўстиришда давом этамиз», — деди вазир.
«Илмий-техникавий, ҳарбий-техникавий ҳамкорлик соҳасида келишувларга эришилгандан сўнг улкан имкониятлар очилади. Ушбу барча келишувларнинг амалга оширилиши нафақат янги саҳифани, балки Ўзбекистон—Россия муносабатларининг ўта жиддий босқичини очади», — дея қўшимча қилди Комилов.
Изоҳ (0)