Ўзбекистон ҳукумати айни вақтда КХШТ (Коллектив Хавфсизлик Шартномаси Ташкилоти)га қайтиш заруриятини кўрмаяпти. Бу ҳақда ташқи ишлар вазири Абдулазиз Комилов россиялик журналистларга берган интервьюсида маълум қилди, дея хабар қилмоқда «Gazeta.uz».

Фото: Ташқи ишлар вазирлиги

«Бугунги кунда, масалан, қандайдир полклар, армиялар, дивизиялар Марказий Осиёга, Ўзбекистонга қарши қандайдир фронтал бостириб киради, деган тахмин билан Ўзбекистоннинг КХШТга қайтиши заруриятини кўрмаяпмиз», — деди Комилов мамлакатнинг КХШТга қайтиши ҳақидаги саволга жавоб берар экан.

Вазир, ўз навбатида, Афғонистонда фаолиятини давом эттираётган ИШИД, «Ал-Қоида», «Хуросон» сингари террористик ташкилотларнинг таҳдид ва ҳужумлари эҳтимолини истисно қилмади.

«Шунинг учун бугун биз вазифани ҳатто янада долзарброқ кўрмоқдамиз, бу қандайдир катта урушга тайёргарлик эмас, КХШТ эса, бу — жуда катта салоҳиятга эга, терроризм таҳдидининг аниқ чақириқларини ўз вақтида акс эттирадиган ташкилот», — деди Комилов.

Вазир сентябрь ойида Душанбеда бўлиб ўтган ШҲТ ва КХШТ қўшма мажлисида Ўзбекистон президенти Шавкат Мирзиёевнинг Афғонистондаги вазият эскалацияси ортидан ушбу икки бирлашмага аъзо давлатлар махсус хизматларининг ўзаро ҳамкорлигини мувофиқлаштириш тарафдори эканини таъкидлаганини эслатиб ўтди.

«Ўз вақтида маълумот олиш, огоҳлантириш ва чек қўйиш. Бу бизнинг вазифамиз бўлиши керак. Шу билан бирга, Россия ва қўшни давлатлар билан фаол ўзаро муносабатлар мавжуд», — деди Комилов.

«Бироқ ҳодисалар, вазиятнинг қандай ривожланишини худо билади. Ҳамкорлик шакллари ҳам ўзгариши мумкин», — дея қўшимча қилди Комилов.

Маълумот учун, Ўзбекистон 2012 йилнинг декабрида КХШТдаги иштирокини тўхтатган. Ҳозирда ташкилотга Арманистон, Беларусь, Қозоғистон, Қирғизистон, Россия ва Тожикистон аъзо.