O‘zbekiston hukumati ayni vaqtda KXShT (Kollektiv Xavfsizlik Shartnomasi Tashkiloti)ga qaytish zaruriyatini ko‘rmayapti. Bu haqda tashqi ishlar vaziri Abdulaziz Komilov rossiyalik jurnalistlarga bergan intervyusida ma’lum qildi, deya xabar qilmoqda “Gazeta.uz”.
“Bugungi kunda, masalan, qandaydir polklar, armiyalar, diviziyalar Markaziy Osiyoga, O‘zbekistonga qarshi qandaydir frontal bostirib kiradi, degan taxmin bilan O‘zbekistonning KXShTga qaytishi zaruriyatini ko‘rmayapmiz”, — dedi Komilov mamlakatning KXShTga qaytishi haqidagi savolga javob berar ekan.
Vazir, o‘z navbatida, Afg‘onistonda faoliyatini davom ettirayotgan IShID, “Al-Qoida”, “Xuroson” singari terroristik tashkilotlarning tahdid va hujumlari ehtimolini istisno qilmadi.
“Shuning uchun bugun biz vazifani hatto yanada dolzarbroq ko‘rmoqdamiz, bu qandaydir katta urushga tayyorgarlik emas, KXShT esa, bu — juda katta salohiyatga ega, terrorizm tahdidining aniq chaqiriqlarini o‘z vaqtida aks ettiradigan tashkilot”, — dedi Komilov.
Vazir sentabr oyida Dushanbeda bo‘lib o‘tgan ShHT va KXShT qo‘shma majlisida O‘zbekiston prezidenti Shavkat Mirziyoyevning Afg‘onistondagi vaziyat eskalatsiyasi ortidan ushbu ikki birlashmaga a’zo davlatlar maxsus xizmatlarining o‘zaro hamkorligini muvofiqlashtirish tarafdori ekanini ta’kidlaganini eslatib o‘tdi.
“O‘z vaqtida ma’lumot olish, ogohlantirish va chek qo‘yish. Bu bizning vazifamiz bo‘lishi kerak. Shu bilan birga, Rossiya va qo‘shni davlatlar bilan faol o‘zaro munosabatlar mavjud”, — dedi Komilov.
“Biroq hodisalar, vaziyatning qanday rivojlanishini xudo biladi. Hamkorlik shakllari ham o‘zgarishi mumkin”, — deya qo‘shimcha qildi Komilov.
Ma’lumot uchun, O‘zbekiston 2012-yilning dekabrida KXShTdagi ishtirokini to‘xtatgan. Hozirda tashkilotga Armaniston, Belarus, Qozog‘iston, Qirg‘iziston, Rossiya va Tojikiston a’zo.
Mavzuga doir:
Izoh (0)