Президент Шавкат Мирзиёев 14 октябрь куни сиёсий партиялар ва депутат ҳамда сенаторларнинг мақоми тўғрисидаги қонунга ўзгартириш киритиш борасидаги қонунни имзолади.
Унга кўра, «Сиёсий партиялар тўғрисида»ги қонундан 14-2-модда (Ўзбекистон Республикаси Олий Мажлис Қонунчилик палатаси депутатининг вакили) чиқариб ташланган. «Ўзбекистон Республикаси Олий Мажлис Қонунчилик палатаси депутатининг ва Сенати аъзосининг мақоми тўғрисида»ги қонуни эса 9-4-моддаси (депутат ёрдамчиси) билан тўлдирилган.
Қонун билан депутат ўзини депутатликка номзод этиб кўрсатган сиёсий партия билан алоқасини сақлаб туриш ҳамда ўз сайлов округидаги фаолиятини самарали ташкил этиш учун ёрдамчига эга бўлишга ҳақли экани кўрсатилган.
Ўзбекистонда 18 ёшга тўлган фуқароси депутатнинг ёрдамчиси бўлиши мумкин. Қуйидаги шахслар депутатнинг ёрдамчиси бўлиши мумкин эмас, агар:
- тегишли депутат билан яқин қариндош (ота-она, ака-ука, опа-сингил, фарзанд, эр-хотин, шунингдек, эр-хотинларнинг ота-онаси, ака-укаси ва опа-синглиси) бўлса;
- у қонунда белгиланган тартибда муомалага лаёқатсиз деб топилган бўлса;
- содир этган оғир ёки ўта оғир жинояти учун судланганлик ҳолати тугалланмаган ёхуд судлангани олиб ташланмаган бўлса.
- депутатнинг уни депутатликка номзод этиб кўрсатган сиёсий партия, унинг тегишли сайлов округидаги ҳудудий бўлими ҳамда сайловчилар билан самарали алоқа ўрнатишига кўмаклашади;
- сайлов округида жисмоний ва юридик шахслардан депутат номига келиб тушган мурожаатларни рўйхатга олади ва бу ҳақда депутатни хабардор қилади;
- жисмоний шахсларни ва юридик шахсларнинг вакилларини депутат томонидан қабул қилинишига, шунингдек, депутатнинг сайловчилар билан учрашувларини ташкил этишга кўмаклашади;
- сайлов округи ҳудудида депутатнинг ваколатларини амалга ошириш билан боғлиқ ишларни депутатнинг топшириғига кўра ташкил этади;
- округ сайловчиларини депутатнинг фаолияти тўғрисида хабардор қилади;
- депутатнинг мурожаатларини, сўровларини тайёрлашда ҳамда сайлов округида депутат томонидан жисмоний ва юридик шахслардан олинган мурожаатлар кўриб чиқилишида иштирок этади, мурожаатларда баён этилган масалаларни ўрганади;
- депутатнинг ўз ваколатларини амалга оширишга доир бошқа топшириқларини бажаради.
Депутатнинг ёрдамчисини ишга қабул қилиш депутатнинг тақдимномасига кўра амалга оширилади.У депутатнинг ваколатлари даврига тузиладиган муддатли меҳнат шартномаси асосида ишлайди. Муддатли меҳнат шартномаси депутатнинг ёрдамчиси ва сиёсий партиянинг тегишли раҳбари ўртасида тузилади.
Депутатнинг ёрдамчиси билан тузилган муддатли меҳнат шартномаси депутатнинг ваколатлари муддатидан илгари тугатилган, шунингдек, меҳнат тўғрисидаги қонунчиликда назарда тутилган асослар мавжуд бўлган тақдирда тугатилиши мумкин. Депутат ёрдамчисининг меҳнатига ҳақ тўлаш, шунингдек, унга кафолатли тўловлар ва компенсация тўловлари меҳнат тўғрисидаги қонунчиликда назарда тутилган тартибда сиёсий партия маблағлари ҳисобидан амалга оширилади.
«Gazeta.uz»нинг ёзишича, депутат ёрдамчиси институтини жорий этиш орқали депутат ва сайловчи ўртасидаги мунтазам алоқани яхшилашга эришиш мақсад қилингани ташаббус «Миллий тикланиш» партияси томонидан илгари сурилган.
Аввалроқ адлия вазири Русланбек Давлетов «Ҳошимов иқтисодиёти» лойиҳасига берган интервьюсида сўнгги вақтларда қонунларнинг 10-15 фоизи депутатларнинг ташаббуси билан қабул қилинаётганини маълум қилганди.
«Олдин умуман йўқ эди. Ўйлаб кўринг, биргина депутат — унинг ҳатто ёрдамчиси йўқ, жаҳон тажрибасини таҳлил қиладиган, ўрганадиган, хориж тилини биладиган одам йўқ. Мана яқинда парламент тадқиқотлар инситути шакллантирилди ва ҳозирда ишлаяпти шу, у депутатларга ташаббусларини тўғри йўналтиришида катта ёрдам бераяпти», — деган эди вазир.
Изоҳ (0)