Prezident Shavkat Mirziyoyev 14-oktabr kuni siyosiy partiyalar va deputat hamda senatorlarning maqomi to‘g‘risidagi qonunga o‘zgartirish kiritish borasidagi qonunni imzoladi.
Unga ko‘ra, “Siyosiy partiyalar to‘g‘risida”gi qonundan 14-2-modda (O‘zbekiston Respublikasi Oliy Majlis Qonunchilik palatasi deputatining vakili) chiqarib tashlangan. “O‘zbekiston Respublikasi Oliy Majlis Qonunchilik palatasi deputatining va Senati a’zosining maqomi to‘g‘risida”gi qonuni esa 9-4-moddasi (deputat yordamchisi) bilan to‘ldirilgan.
Qonun bilan deputat o‘zini deputatlikka nomzod etib ko‘rsatgan siyosiy partiya bilan aloqasini saqlab turish hamda o‘z saylov okrugidagi faoliyatini samarali tashkil etish uchun yordamchiga ega bo‘lishga haqli ekani ko‘rsatilgan.
O‘zbekistonda 18 yoshga to‘lgan fuqarosi deputatning yordamchisi bo‘lishi mumkin. Quyidagi shaxslar deputatning yordamchisi bo‘lishi mumkin emas, agar:
- tegishli deputat bilan yaqin qarindosh (ota-ona, aka-uka, opa-singil, farzand, er-xotin, shuningdek, er-xotinlarning ota-onasi, aka-ukasi va opa-singlisi) bo‘lsa;
- u qonunda belgilangan tartibda muomalaga layoqatsiz deb topilgan bo‘lsa;
- sodir etgan og‘ir yoki o‘ta og‘ir jinoyati uchun sudlanganlik holati tugallanmagan yoxud sudlangani olib tashlanmagan bo‘lsa.
- deputatning uni deputatlikka nomzod etib ko‘rsatgan siyosiy partiya, uning tegishli saylov okrugidagi hududiy bo‘limi hamda saylovchilar bilan samarali aloqa o‘rnatishiga ko‘maklashadi;
- saylov okrugida jismoniy va yuridik shaxslardan deputat nomiga kelib tushgan murojaatlarni ro‘yxatga oladi va bu haqda deputatni xabardor qiladi;
- jismoniy shaxslarni va yuridik shaxslarning vakillarini deputat tomonidan qabul qilinishiga, shuningdek, deputatning saylovchilar bilan uchrashuvlarini tashkil etishga ko‘maklashadi;
- saylov okrugi hududida deputatning vakolatlarini amalga oshirish bilan bog‘liq ishlarni deputatning topshirig‘iga ko‘ra tashkil etadi;
- okrug saylovchilarini deputatning faoliyati to‘g‘risida xabardor qiladi;
- deputatning murojaatlarini, so‘rovlarini tayyorlashda hamda saylov okrugida deputat tomonidan jismoniy va yuridik shaxslardan olingan murojaatlar ko‘rib chiqilishida ishtirok etadi, murojaatlarda bayon etilgan masalalarni o‘rganadi;
- deputatning o‘z vakolatlarini amalga oshirishga doir boshqa topshiriqlarini bajaradi.
Deputatning yordamchisini ishga qabul qilish deputatning taqdimnomasiga ko‘ra amalga oshiriladi.U deputatning vakolatlari davriga tuziladigan muddatli mehnat shartnomasi asosida ishlaydi. Muddatli mehnat shartnomasi deputatning yordamchisi va siyosiy partiyaning tegishli rahbari o‘rtasida tuziladi.
Deputatning yordamchisi bilan tuzilgan muddatli mehnat shartnomasi deputatning vakolatlari muddatidan ilgari tugatilgan, shuningdek, mehnat to‘g‘risidagi qonunchilikda nazarda tutilgan asoslar mavjud bo‘lgan taqdirda tugatilishi mumkin. Deputat yordamchisining mehnatiga haq to‘lash, shuningdek, unga kafolatli to‘lovlar va kompensatsiya to‘lovlari mehnat to‘g‘risidagi qonunchilikda nazarda tutilgan tartibda siyosiy partiya mablag‘lari hisobidan amalga oshiriladi.
“Gazeta.uz”ning yozishicha, deputat yordamchisi institutini joriy etish orqali deputat va saylovchi o‘rtasidagi muntazam aloqani yaxshilashga erishish maqsad qilingani tashabbus “Milliy tiklanish” partiyasi tomonidan ilgari surilgan.
Avvalroq adliya vaziri Ruslanbek Davletov “Hoshimov iqtisodiyoti” loyihasiga bergan intervyusida so‘nggi vaqtlarda qonunlarning 10-15 foizi deputatlarning tashabbusi bilan qabul qilinayotganini ma’lum qilgandi.
“Oldin umuman yo‘q edi. O‘ylab ko‘ring, birgina deputat — uning hatto yordamchisi yo‘q, jahon tajribasini tahlil qiladigan, o‘rganadigan, xorij tilini biladigan odam yo‘q. Mana yaqinda parlament tadqiqotlar insituti shakllantirildi va hozirda ishlayapti shu, u deputatlarga tashabbuslarini to‘g‘ri yo‘naltirishida katta yordam berayapti”, — degan edi vazir.
Izoh (0)