Америкалик машҳур рэпер Канье Уэст исмини ўзгартирди

АҚШ суди таниқли рэпер Канье Уэстнинг ўз исмини ўзгартириш борасидаги сўровини қаноатлантирди, деб хабар беради «Korrespondent.net».

«У анча йиллардан буён Йе тахаллусида ижод қилиб келади… Аммо энди исмининг қисқартирилган версияси унинг туғилганлик тўғрисидаги гувоҳномасига киритилди», — дейилади хабарда.

Шундай қилиб, тўлиқ исми Канье Омари Уэст бўлган 44 ёшли рэпер эндиликда 2018 йилда тақдим этилган альбомининг номи каби шунчаки Йега айланди.

Каньенинг ўзи ушбу сўз «Инжил»да кўп такрорлангани ва у «сен» дея таржима қилинишини таъкидлаган.

Суд қўшиқчининг исмини ўзгартириш борасидаги даъвосини қарий икки ой кўриб чиққан. Рэпер бу каби хатти-ҳаракатини «шахсий сабабларим» дея изоҳлаган.

Аввалроқ Netflix Канье Уэст ҳақидаги ҳужжатли фильмни намойиш этиш ҳуқуқини 30 миллион долларга сотиб олгани, фильм 21 йил давомида яратилгани тўғрисида хабар берилганди.