Қашқадарё вилоятининг Чироқчи туманидаги 3 та мактаб ўқувчи қизлари ўзаро жанжаллашди. Ҳолат акс этган видео ижтимоий тармоқларда тарқалди.
Фото: Видеодан кадр
Вилоят ИИБ матбуот хизматининг маълум қилишича, ҳолат 20 сентябрь куни Чироқчи тумани 2-, 4- ва 5-умумий ўрта таълим мактаблари 9-, 10-, 11-синфининг 3 нафар ўқувчиси ўртасида юз берган. Улар олдиндан бўлган келишмовчилик сабабли 1-умумий ўрта таълим мактаби маъмурий биносига борганда ўзаро гаплашиш вақтида жанжаллашиб қолган.
Ҳозирда мазкур ҳолат юзасидан 1-умумий ўрта таълим мактабида ички ишлар органлари, халқ таълим бўлими ва маҳалла фуқаролар йиғини фаоллари ҳамда ота-оналар иштирокида жанжалнинг келиб чиқиш сабаблари ўрганилиб, муҳокама қилинмоқда.
Ҳозирда барча ўқувчиларнинг ота-оналарига нисбатан Маъмурий жавобгарлик тўғрисидаги кодекснинг 47-моддаси (болаларни тарбиялаш ва уларга таълим бериш борасидаги мажбуриятларни бажармаслик) тартибида ҳужжатлар расмийлаштирилган.
