Jurabek Laboratories МЧЖ қўшма корхонасида ишлаб чиқарилаётган «Спутник V» вакцинаси 1- ва 2- компонентларининг дастлабки 260 500 дозаси Санитария-эпидемиологик осойишталик ва жамоат саломатлиги хизматига топширилди, деб хабар беради ССВ матбуот хизмати.
Кадр: «Ўзбекистон 24»
Бу Ўзбекистонда тайёрланаётган иккинчи вакцина бўлиб, бундан аввал ушбу корхонада жами 7 миллион доза ZF-UZ-VAC2001 вакцинаси ишлаб чиқарилган ва унинг 1 458 820 дозаси эмлаш учун топширилган.
Шундай қилиб, мамлакатда эмлаш жараёнларида фойдаланилаётган жами вакцина 28 473 528 дозани ташкил қилмоқда. Улардан:
- 1 594 480 дозаси AstraZeneca,
- 21 958 488 миллион дозаси ZF-UZ-VAC2001,
- 720 500 дозаси «Спутник V»,
- 3 000 060 дозаси Moderna,
- 1 200 000 дозаси Pfizer/BioNTech вакцинасидир.
Шундан 22 721 129 дозаси эмлаш жараёнларида қўлланилган бўлиб, 5 226 139 нафар аҳоли коронавирусга қарши барча босқичларда тўлиқ эмланган.
Эслатиб ўтамиз, май ойида Россиянинг «Спутник V» вакцинасини Ўзбекистонда ишлаб чиқаришни йўлга қўйиш бўйича келишувга эришилгани маълум қилинган эди. Ўзбекистон томони бундай таклиф билан 2020 йилнинг декабридаёқ чиққан ва ишлаб чиқариш майдончаси сифатида Tashkent Pharma Park ҳудудини таклиф қилганди.
Россия Хавфсизлик кенгаши котиби ўринбосари Рашид Нургалиев 26 июль куни «Российская газета»га берган интервьюсида Ўзбекистон яқин орада Россиянинг «Спутник V» вакцинасини ишлаб чиқаришни йўлга қўйишни режалаштираётганини маълум қилганди. Ўзбекистон дори воситаси ишлаб чиқариладиган ҳудудни ҳам танлаганини ҳам айтганди.
Август ойи охирида Ўзбекистон ҳукумати Jurabek Laboratories компаниясида ишлаб чиқарилган ZF-UZ-VAC2001 ва «Спутник V» вакциналарини давлат рўйхатидан ўтказишга рухсат берган эди. Сентябрь ўрталарида эса Ўзбекистонда ишлаб чиқарилган «Спутник V» вакцинаси октябрь ойида ички бозорга чиқарилиши маълум бўлганди.
«Вакцинани қуйиш аллақачон бошланган. Биз ҳар бир серияни текширувдан ўтказиш учун Россияга юборамиз. Таҳлиллар тахминан уч ҳафта давом этади. Россияда ва (маҳаллий) давлат марказий лабораториясида параллел назорат мавжуд. Жавоблар чиқиши билан биз (вакцинани Соғлиқни сақлаш вазирлигига) жўнатишимиз мумкин бўлади», — деган эди Jurabek Laboratories’нинг маркетинг ва сотиш бўлими бошлиғи Азиз Соипов.
