Абдулазиз Комилов Кобулда толиблар ҳукуматининг ташқи ишлар вазири билан учрашди

Ўзбекистон ташқи ишлар вазири Абдулазиз Комилов бошчилигидаги делегация Афғонистон муваққат ҳукуматида ташқи ишлар вазири лавозимига тайинланган Амирхон Муттақий билан учрашди. Бу ҳақда «Толибон» томонидан афғон ташқи сиёсий идораси вакили этиб тайинланган Абдул Қаҳор Балхий Twitter орқали маълум қилди, деб хабар беради «Gazeta.uz».

Маълум қилинишича, музокаралар бошида Муттақий ўзбекистонлик ҳамкасбини қутлаб, мамлакатдаги вазият яқинда нормаллашишига ишонтирган.

ТИВ вакилининг ёзишича, Абдулазиз Комилов «кўчалар тозалиги, шаҳарнинг бошқаруви, кўчалардаги одамлар ва хавфсиз муҳитни кўрганидан хурсанд эканини» айтиб, Ўзбекистон доимо икки мамлакатнинг ўзаро манфаатлари учун эътибор қаратиб келганини, «Ўзбекистоннинг Афғонистонга нисбатан ташқи сиёсати бошқа масалаларга боғланмаганини» қўшимча қилган.

«Абдулазиз Комилов Афғонистон тез орада халқаро ҳамжамиятда ўзининг мустаҳкам ўрнини эгаллашига умид билдирган ва Ўзбекистон олдингидек транзит, энергетика ҳамда савдо мажбуриятларига содиқлигига ишонтирган», — дейилади хабарда.

Ўз навбатида Амирхон Муттақий Мозори Шариф аэропотининг реконструкцияси ва бошқа соҳалардаги ёрдами учун ҳамкасбига миннатдорчилик билдирган.

Аввалроқ Ўзбекистон Афғонистонда «Толибон» томонидан муваққат ҳукумат тузилганини олқишлагани ҳақида хабар берилганди. Шундан сўнг «Толибон» Ўзбекистоннинг Кобулдаги янги ҳукумат билан алоқа ўрнатишга тайёрлигини эътироф этган. Октябрь бошларида Ўзбекистоннинг Афғонистондаги элчиси Ёдгорхўжа Шодмонов Муттақий билан Мозори-Шариф шаҳридаги аэропортни реконструкция қилиш ва авиақатновларни қайта тиклаш масалаларини муҳокама қилганди.