Қамчиқ довонида 6 октябрь куни 4 та машина иштирокида ЙТҲ юз берди. Бу ҳақда ФВВ матбуот хизмати хабар берди.

Фото: ФВВ матбуот хизмати

Қайд этилишича, шу куни соат 06:20 ларда Қамчиқ довонининг 199 километрида Водий—Тошкент йўналишида ҳаракатланган Spark ҳайдовчиси бошқарувни йўқотиб, йўл ўртасидаги темир тўсиққа урилган. Унинг ортидан келаётган, Spark’дан қочмоқчи бўлган Gentra, Cobalt ва яна бир Gentra машиналари ҳам ЙТҲга учраган.

Фото: ФВВ матбуот хизмати

Фото: ФВВ матбуот хизмати

Зудлик билан Қамчиқ МҚЁҚБ қутқарувчилари, тез тиббий ёрдам, ЙПХ, «Қамчиқавтойўл» Ихтисослашган йўллардан фойдаланиш унитар корхонаси ходимлари воқеа жойига етиб борган. Қутқарувчилар жароҳат олган фуқароларни автомошиналар ичидан чиқариб олган.

Spark салонида ҳайдовчи ва бир нафар йўловчи бўлиб, йўловчи тан жароҳати олган. Cobalt’нинг ҳайдовчиси ўнг қўл синиши ташхиси билан Ангрен шаҳар Марказий шифохонасига юборилган. Ҳозирда шифокорлар уларнинг аҳволи яхшиланганини билдирган. Қолган автоуловдаги йўловчи ва ҳайдовчилар енгил тан жароҳати олгани сабаб уларга шу жойнинг ўзида биринчи тиббий ёрдам кўрсатилган.

Хабарда айтилишича, ушбу йўл-транспорт ҳодисаси автомобиль ҳайдовчилари ноқулай об-ҳаво шароитини инобатга олмай, тезликни ошириб ҳайдаши оқибатида юз берган.

Эслатиб ўтамиз, Қамчиқ довонида 5 октябрь куни кечаси қор ёғди. Шу сабабли ЙҲХББ барча ҳайдовчилардан қоидаларга риоя қилишларини, довон йўлидан ҳаракатланиб ўтувчилардан эса ўта эҳтиёткор бўлишларини сўраганди. ЙҲХББ, шунингдек, Ўзбекистонда об-ҳаво кескин пасайиши кутилаётгани сабаб ҳайдовчиларга шиналар ҳолатига эътиборли бўлишга ҳам чақирганди.