Коронавирус ошқозоности безининг функциясини ўзгартириб юборади ва бу ўз навбатида диабетга олиб келиши мумкин. Бу ҳақда Нью-Йоркдаги Weill Cornell Medicine тиббиёт маркази тадқиқотлари натижасига таяниб «Korrespondent.net» хабар берди.
Олимларнинг аниқлашича, коронавирус ҳужайраларга шикаст етказгач, уларнинг фаоллигини пасайтирибгина қолмай, балки функциясини ҳам ўзгартириб юбориши мумкин. Масалан, ошқозоности безида инсулин ишлаб чиқарувчи бета-ҳужайрага вирус тушса, улар инсулин ишлаб чиқаришни одатдагидан кўра камайтирибгина қолмай, глюкоза ва овқат ҳазм қилдирувчи моддаларни ҳосил қилишни бошлайди. Бу эса уларнинг функциясига кирмайди.
«Биз буни ҳужайралар тақдирининг ўзгариши деб атаймиз», — дейди тадқиқот раҳбари Шуйбинг Чен. У ўз тадқиқотлари натижасини диабетни ўрганиш бўйича Европа ассоциациясининг ҳар йили ўтказиладиган йиғилишида тақдим этган.
Айни вақтда бу каби ўзгариш ижобий ёки акс таъсир кўрсатиши ноаниқлигича қолмоқда. Ченнинг таъкидлашича, коронавирусга чалинган айрим беморларда диабет юзага келган. У ушбу масала яна ўрганилиши кераклигини билдирган.
«Коронавирус пандемияси вақтидаги диабети бор янги беморларнинг фоизини шубҳасиз ўрганиш керак», — дея қайд этади эксперт.
Аввалроқ олимлар COVID-19 га қарши ўта кучли иммунитет ҳосил қилиш йўлини аниқлагани, SARS-CoV-2 ҳар ҳафта мутацияга учраши мумкинлиги тўғрисида хабар берилганди.
Изоҳ (0)