Ўзбекистонда муқаддам судланган шахсларга ҳам болаларни фарзандликка ва васийликка олишга рухсат берилиши мумкин

Ўзбекистонда ижтимоий аҳамияти катта бўлмаган, унча оғир бўлмаган ҳамда фарзандликка олишга тўсқинлик қилмайдиган жиноят турларини содир этиб, жазо муддатини ўтаганларга нисбатан фарзандликка ва васийликка олиш имконияти яратилди. Бу ҳақда Сенатнинг 30 сентябрь куни бўлиб ўтган 19-ялпи мажлисида маълум қилинди.

Қайд этилишича, бугунга келиб  фарзандликка олиш истагида навбатда турганларнинг сони фарзандликка олганларга нисбатан анча юқорилигича қолмоқда. Оқибатда ноқонуний йўллар билан фарзанд асраб олиш, шу жумладан, бола савдоси билан боғлиқ ҳолатлар учрамоқда.

Шу боис фарзандликка олиш борасидаги ишлар таҳлили ҳамда қонунчиликда мавжуд тартиб-таомиллар билан боғлиқ бўшлиқларни бартараф этиш мақсадида «Фарзандликка олиш тартибининг ҳуқуқий асослари такомиллаштирилиши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги қонун ишлаб чиқилди.

Мазкур қонун билан Оила кодекси ҳамда «Васийлик ва ҳомийлик тўғрисида»ги қонунга ўзгартиш ва қўшимчалар киритиш назарда тутилмоқда. Қонун билан ижтимоий аҳамияти катта бўлмаган, унча оғир бўлмаган ҳамда фарзандликка олишга тўсқинлик қилмайдиган жиноят турларини содир этиб, жазо муддатини ўтаганларга нисбатан фарзандликка ва васийликка олиш имконияти яратилмоқда.

Шунингдек, боланинг энг устувор манфаатларини ҳисобга олган ҳолда, фарзандликка олишга монелик қиладиган касалликларга чалинган шахслар рўйхати Вазирлар Маҳкамаси томонидан тасдиқланиши белгиланмоқда.

Сенат хабарида таъкидланишича, ушбу қонуннинг қабул қилиниши бола ҳуқуқларининг ҳимоя қилиниши тўлақонли таъминланиши ва болаларни ноқонуний фарзандликка олиш, айниқса, бола савдосининг олдини олиш мақсад қилинган.